U Dr. Mukul Sangma uwa man leh kam uwa yahkhmat ka Liang Pyrchah, ynne hapoh ka yung dorbar da wanrah u ya ka Resolution yow booh ya ka Winter Capital ha Tura tangwa ym em yoh u yei kyrchaan wot na kiwa boon ki MLA kiwa na Garo Hills lait na ki kattu katni.
Ym em leh yoh u i kyrchaan na kiwi ki MLA ka jylla kiwa da ong wa kam ka jylla wa khian ym bha wow em ar tylli ki nongbah hanla kiwi ki jylla wa heh da em wa leh yeini.
Na ki MLA na Garo da em wa kylli na u Mukul wa heipor wa em u hei bor ileh ym em leh u yeini.
Hadien wa da klam da waroh kiwa boon toh ki MLA na Garo, u Montri Rangbah, u Conrad Sangma da ong u wa ki kaam wa da leh ka sorkar da thai ki bar ya ki kyntien wa klam wei da kyntu u leh ya u Mukul wow pyndam noh ya kani ka Resolution.
Da kular u leh wow thung da ka Committee wow pait yeini neibhah emkaam hi wow pynyajan ya ki paidbah wa ki kor synchaar ka sorkar.
Da kdaw u leh wa ha ki 53 snem wa da lai, kawon kawon ka Resolution wa da wanrah da ka liang pyrchah ym jooh em jop wei ini ym em mut wym em sñiawthooh yei emkaam ka phang wa da wanrah.
U Conrad da ong u leh wa kani ka phang Winter Capital toh kawa da em kiwa boon kiwa da wan yachem yow yaklam wa oo tangwa da ong u wa ka thong ka sorkar toh wow wanrah ya ki kaam pynroi.
Da e nongmuna u wa ka sorkar dadep pynman Cabinet Meeting ko ha Tura, Jowai, Sohra wa Resubelpara wei hawa leh ya kini ymtoh wow kheiñ yei lutsan neibhah wa kwah wow lai pynyajan cha ki paidbah.
Da khana u leh wa da chna leh ya ki Administrative Complex ha Tura, Jowai wa Pynursla wei da chna leh ya ka Raj Bhavan ha Tura.
Hadien ini da booh ha ka yung dorbar wow chim yei rai heiwa da pynrem ya kani ka Resolution.
Discussion about this post