Ka Synjuk ki Waheh Chnong Jowai ha ka yalang yong ka kawa chong pynman hei janmiet ka 6 tarik ha Yungwalieh ka Dorbar Chnong Loompyrdi Iongpiah, Jowai da pynthymme ko leh ya kiwa ksohkaam neibynta u snem 2025-2026.
Hachwa wow pynthymme ya kiwa ksohkaam da pynman leh yei pynkup burom ya ka khyllood Ridamaya Passah kawa da yoh naam Sunsilk Mega Miss North East 2024 wei da chah jied ko wow mihkhmat ya ka ri India cha ri Turkey wow yakhun ya ka Top Model of the Universe 2024.
Ka Ridamaya Passah toh ka khon yong ka Nira Passah, kawa chong wa sah ha Loompyrdi Iongpiah, Jowai ha kyntoit Khlieh-Aitnar. Ha ka yakob Top Model of the Universe 2024, ym em u poi ko cha ka thong, tangwa da yoh won ko u rah yei burom, deiwa yow yei naam Best Face ha kani ka yakob.
Ya ka yalang da pynlai da u President ka Synjuk, u Jlan Kupar Rymbai uwa da e ki kyntien pdiang burom ya waroh dep neitæ pynbood sa i klam na u Riquoma Rq. Laloo, General Secretary ka synjuk.
Da pynkup burom haroh ka synjuk ya uwa yah ya ka Ambulance yong ka, u Samewan Roy Rymbai, wa man u uwa em akor em burom, wa tip u kheiñkor yei kaamram weiwa kreh hoh sakhiat ya ki kaam. Da pynkup burom ya oo da u Vice President ka synjuk, u Embhahlang Lyngdoh deiwa e ya ka Certificate wa ka song poisa wa sanhajar tyngka. Hadien neitæ da pynkup burom ya ka Ridamaya Passah da u President ka synjuk, u Jlan Kupar Rymbai.
Hei klam yong u General Secretary, da khana tbian u yei lai luti ka synjuk wow pynkhreh hadooh wa poi kani ka miet wow pynkup burom. Da ong u wa sñiawkmen wow yoh u e burom ya ki khon ka Ri Jaiñtia wa chong wa sah khamtam hapoh sor Jowai, yeiwa da ye ki u lai mihkhmat ya ka ri India cha kiwi tawon ki ri ka pyrthai. Kani hi man ko ka burom yong samen, ka burom ka yung heijooh i por ka burom ka chnong ka thaw wa ka ri hi waroh kawi.
Da e kyntien kyrkhu kyrdoh u ya ka Ridamaya wow nang kaap chooh chooh ko chaphrang hei thmu wa bha yong ka, yoh ko u ye u pyndep ya iwon iwon iwa da mang ko. Da khana u wa ka synjuk hi ym du wow pynkup burom ya kiwa rah naam du hapoh ka ri India, pynchlur ko yow ye ki u mih cha baar ka ri ha kawon kawon ka sap kawa em ha ki. Da ong haroh u wa ka Ridamaya ym ye ko u pdiang yei pyntip khlem da wan ka kot na u waheh chnong yong ki wei kani man ko ka nuksa yoh ki u tip u burom chwa ya ka chnong yong ki dahi. Khut u ya kiwi wow bood ya kani ka nuksa yong kani ka khyllood, kam ka dak wow kyntu kynrong yei sap wa em ha ki.
Da yoh leh yei klam na ka Ridamaya, kawa ong wa hadooh katni dang em i pynkhreh yong ka ya kiwi tawon ki yakob. Paan ko yei kyrchaan na ki paidbah waroh la ha kawon kawon ka dur leh, deiwa e khublei kyrpang ko ya ka Synjuk Waheh Chnong Jowai kawa da pynman ya kani ka pynkup burom kam chibynta wow pynchlur ya ka wow kaap ko chaphrang.
Ya ki kyntien e khublei, da e da u Charemi Laloo, Assistant General Secretary ka synjuk. Hadien wa kut ka yalang pynkup burom, da pynman sa ka yalang pynthymme ya kiwa ksohkaam heiwa dajied ya kini ha wah neibynta u snem 2025-2026:
President – U Jlan Kupar Rymbai, Waheh Chnong Loompariat
Vice President – U Riquoma Rq. Laloo, Waheh Chnong Panaliar
General Secretary – U R.L. Bimee Suwer, Waheh Chnong Loompyrdi Iongpiah
Assistant General Secretary – U Charemi Laloo, Waheh Chnong Dongmihsngi
Treasurer – U Harwis C. Dkhar, Waheh Chnong Mooralong
Waroh ki waheh chnong yong ki dorbar chnong waphær waphær hapoh ka synjuk, u man hi ki ki Executive Member. Da jied leh ya u Anderson Manner, General Secretary Loompariat, u Ram Sumer, Assistant General Secretary Panaliar wa u Elad Suting, General Secretary Khimusniang kam ki dkhot ka Auditorial Board.
Ha katai ka jooh ka yalang da rai wei da pynskem wow pynpsiah dkhot cha ka General Body ka synjuk ya ka Chairperson wa ka Secretary yong ki Seiñ Kynthai yong kawi pa kawi ka dorbar chnong.
Pur leh: Jop ka Ridamaya Passah ha ka Mega Miss North East 2024
Discussion about this post