Pynsñiawthooh ka DCPU chaphang ki aiñ wa yada yei hok ki khynnah ha ka chnong Sakhain

Ka District Child Protection Unit (DCPU), East Jaiñtia Hills da pynman ko yei pynsñiawthooh ha ka 6 tarik uni u bnai ha chnong Sakhain, EJH wow pynche ya ki khynnah wa ki paidbah hajrong ka Child Protection Services wa kynthup chaphang yong ka aiñ Juvenile Justice Act (JJ Act), Protection of Children from Sexual Offences (POCSO) Act, Early Child Marriage, Right to Education wa ki hok ki khynnah wa ki kaam wa man pyrchah ya ki (Child Rights and Child Abuse).

Ka District Child Protection Officer, ka R. Kynjing hawa e yei klam da pynche ko hajrong ka aiñ POCSO Act heiwa kani ka aiñ klam ko hajrong kammon wow yada ya ki khynnah na ki kaam wa man pyrchah ya ki. Da batai ko leh ya ki khynnah ya ki daw wa i chah ktah nei chah leh khlemakor weiwa boonsien jooh jia pyn da ki bru kiwa yatip wa yajooh yajan donhi, kamtæ da kyntu ya ki khynnah wow man kiwa syndong la ha i lai i wan la ha yung ha sem, wei lada em kam itæ i jia toh u wan chakhmat u pyntip cha kani ka Office khlem da artatien khnang u yoh ki ka laad yada katkam ka aiñ.

Chooh chooh da pynsñiaw leh yei ktah nei chongkha khynnah khlem da biang i rta iwa ye u wanrah yei eh ha idæ la hei thij i pyrkhat wa i chait i khiah, kmtæ da kyntu ya kiwa chong chnong u ya krehlang u pynsñiawthooh kylliang ya ki khon ki kti khnang yoh u lait u jia ini ha ka chnong ka thaw wa ha ka imlang sahlang.

Neiliang won ka Rilutmon Syad na ka Office yong ka District Mission Coordinator, SSA-EJH hei e yei klam da pynsñiawthooh ko hajrong i hok yong ki khynnah, u yoh lai skur mynkna (Right to Education) ha ki skur sorkar, ki skur SSA deiwa yoh yarap na ka sorkar nadooh ki kot puræ, ka bai Uniform, Mid-Day Meal wa kiwi kiwi. Kamtæ da kyntu ya ki bei ki pa kiwa chong chnong wym hoi de khlem da pynlai skur ha ka juk wa katni khnang yoh u lait u sahdoom u chah lehbeiñ ha kiwi.

Related posts

Ym burom ka Pakistan ya ka Cease Fire deiwa pteiñ hi yei jooh

May 10, 2025

Da ka that chah ieh hapoh doh ka manbei wa wan kha khon ha MCH Jowai

May 10, 2025

Hachwa u pynkut da yoh yei leh Drama hajrong ka aiñ POCSO da kiwa kreh yong ka Child Helpline, EJH wow pynkynmoo ya ki paidbah yei kaamram wow yada ya ki khynnah ha waroh ki liang wei wow pyntip ya ki khynnah ya ki hok yong ki katkam ki aiñ.

Ha kani ka sngi da chimbynta da waroh ki khynnah skur wa em ha kani ka chnong, kiwa kitkaam ka chnong, kiwa sikai wa ki paidbah wa chong chnong.

Ha kani ka yalang da yoh yei kyntien pdiang burom wa kyntien khublei na u Waheh Chnong, u Omega Myrphet.