Ynne ka sngi ka Panaliar Khynroo Khyllood Welfare Organisation (PKWWO) da pynman ko ya ka ‘1st Panaliar Youth Meet-cum-Felicitation Programme’ ya kawa da pynman ha Yungwalieh Panaliar, Jowai heiwa u Freddy Passah, Assistant Commissioner, East Jaiñtia Hills District da man u kam u kongsan ryngkat i emlang wa ka Dr. N. Dkhar, Assistant Commissioner, East Jaiñtia Hills District wa u Eladmiki Suting, Principal, Goodshepherd School Jowai.
Ha kani ka yachemlang da yoh ya ki kyntien pdiang burom na u Chairman ka PKWWO, u Kamwa Laloo wa ki kyntien noohblai na u President ka PTEDS, u Chanhun Laloo.
U Waheh Chnong ka Panaliar, u Careme Phawa hawa e i klam da kitbok u ya ki khon ka chnong ki wow tia ki chaphrang ha i puræ yong ki khnang wow ye ki u chakri ya ka imlang sahlang.
U Medical Officer ka Ummulong CHC, u Dr. Pura Pakma da e u ya ki kyntien sneiñ deiwa ong u wa nachwa kam u khynnah jooh chong u ha yungwalieh heipor kut snem heiwa da sakhi ya kiwa Pass bha wei ini da e mynsien ko ya oo wa ha kawi ka sngi wot oo leh daw ku u ha ka rynsaan iwa da pynman ya oo wow man uwa minot wei kreh chitom.
Da ong u wa hawa lai puræ chapoh dkhar daw yachem boon ki jaitbru wot na baar ri wei heitæ daw ye u pynwansur ya i rukom im wa samen yong ki khynnah iwa ye u yarap ya ki wow chakri ya ka imlang sahlang.
Da kyntu u ya kiwa lai puræ wym toh u ieh yei puræ chiteiñ tang wow raikut wow pyndep yeiwa da thrang wei angnood.
Kam u kongsan, u Freddy Passah da kyntu u ya ki khynroo wa ini i yachemlang wow pachat yeiwa chem ki man-ka-sngi.
Da ong u wa emkaam u man ki bru wow em i bahkhlieh wow pyndep yei eh i khor wa chem wei wow pynbait yeiwa eh heithaw wow ood wei wow ujor donhi.
Chooh chooh da ong u wa i kreh sorkar man i kam ka thong donhi tangwa cha lyndet leh em kiwi tawon ki laad wa ye u poi ha ka thong yong ki deiwa lai cha ki yung krehkaam wow thooh ya kitæ ki laad deiwa kdaw leh ya ka Deen Dayal Upadhyay Community College (DDUCC) kawa e sikai ha ki puræ wow yoh kreh ym kamwa man kam ka ITI wa Polytechnic.
Da kyntu u ya ki manbei manpa wow pynchlur ya ki khon wei wow tip yei bor yong ki khlem nujor wa kiwi ki khon wa ki khynnah ha talawiar soodong.
Ha ka Session wa nyngkong, ka Dr. Nidakyrkhu Dkhar da e ko i klam chemphang hajrong ka Comprehensive Study Approach & Strategy on Preparation of Civil Services.
Ha ka Session wa ar u bru chemphang, u Eladmiki Suting uwa man u Principal ka Good Shepherd School da batai u hajrong ka phang Entrepreneurship namo i seiñ khih seiñ kreh.
Ha kani ka sngi da pynkup burom leh ya ki khon ka chnong kiwa leh bha ha ki Exam waphær waphær nadooh SSLC, HSSLC, Graduate, Post Graduate wa PhD.
Da pynphooh ya kani ka sngi da ki chaad wa ki rwai wei ya ki kyntien khublei da yoh na u Dr. Dariyoo Passah uwa man u Secretary ka PKKWO.
Discussion about this post