Ka Mihmyntdu Community Social Welfare Association (MCSWA) deiwa kyrchaan ka chnat Social Welfare, ha ka 7 tarik uni u bnai da pynman ko yei pynsñiawthooh cha kiwa da heh rta heiyatoh i hok waphær waphær yong ki haka imlang sahlang wa kynthup nadooh i chait i khiah, ki Scheme yarap na ka sorkar wa kiwi ha ka yalang wa da pynman ha Indoor Hall ka Lion Mission Compound Dorbar Chnong Jowai.
Ha ka yalang wa pynlai da u Damehiwot Pde, da yoh i klam yahkhmat na ka Dr. J.N. Shullai, Director MCSWA, heiwa u Aris J. Nongkynrih, Chief Functionary (MCSWA) hawa khana yei lai luti ka MCSWA kamjooh ki Scheme wa pynkrehkaam ko, da khana u wa heiyatoh wa kiwa da heh rta leh ka MCSWA dadep wai ko ya ka yung wa kyrpang neibynta yong ki ynnin u snem ha Salaroh tangwa katni da rah noh ha Lion Mission Compound kawa tip kam “Senior Citizens Dropping Centre cum Day Care Center”.
I thmu lyngba kani ka yung wa kyrpang toh yow pynyoh bynta leh ya ki waka imlang sahlang, u yoh laad ki u yachemlang para wa da heh rta yow yoh yei kmen i rkhai khnang yow chait khiah i bor pyrkhat pyrdaiñ.
Neitæ ha kani ka Centre kiwa da heh rta daw yoh ki leh i sñiawthooh yei hok yong ki kamjooh ki Welfare Scheme, daw pynchlur leh ya kiwa ha-yung kamjooh ka imlang sahlang wow chimbyntalang ki hajrong kammon u yarap ya kiwa da heh rta deiwa e i chakri wa miat wa bha.
Ki bru chemphang wa da klam ha kani ka sngi kynthup ki ya ka Kyntiewlin Pakynteiñ (Lawyer) kawa klam hajrong i hok yong kiwa da heh rta, u Rabi Nath Patir, Branch Manager ka Bank of Baroda uwa da klam u hajrong ka phang Right and Benefit of Senior Citizens in the Bank, neitæ u Akhtar Ali Ahmed, Branch Manager ka Life Insurance Corporation (LIC) uwa da klam u hajrong ka Scheme and Benefit of Citizens in LIC.
Da yoh leh i klam napoh ka Office ka DM&HO, hajrong ka phang Right to Health & Facilities in Health Department wa e da ka Dr. Helen Uriah, District Maternal and Child Health (MCH) Jowai heiwa khana ko yei eh i khoo wa maad da kiwa da heh rta ha-yung kamjooh ha ka imlang sahlang katwa ka Lugretia Laloo Syngkrem kawa man kam ka dkhot ka DI & Day Care Center (MCSWA) Mission Compound Jowai da e ko i kyntien khublei.
Discussion about this post