Ka Kur Sookpoh Khadar Wyrnai Jowai, kam chibynta ki kaam ‘Social Activities’ yong ka kur, ynne ka sngi da pynlait paidbah ko ya ki Ticket Lucky Draw ha yung kur wa em ha Chiliangraij, Jowai wei da wan wow pynlait da u Taiwan War, Divisional Soil Conservation Officer Territorial Division Jowai, hei emlang u Lamphrang Pohktai, Divisional Soil Conservation Officer, Plantation Crops Division Jowai, neitæ ki khon ka kur nadooh ki waheh wasian, kiwa yahkhmat yong ka wa kiwi.
U Puramon Kynjing kam u President ka Kur Sookpoh Khadar Wyrnai hawa klam yahkhmat ong u wa ka Fete wa daw pynman man ko ym du wow pynmih poisa neibynta i emkaam ka kur tangwa man ko leh chibynta wow wanrah i ya maya para kur, chi kha, chi man, neibhah wa ka Kur Sookpoh ym ku ko khlem em ki kur wa e i kyrchaan, ym heh ym kmai ko klem em ki kurim ki watang wa ki kha ki man wa e i kyrchaan.
Heijooh i por ong u ka Fete man haroh ko chibynta u ya e mynsienlang, wei embyntalang ha iwon iwon yow rah yei burom ka kur.
Neiliang u kongsan, u Taiwan War wa u symbood kongsan, u Lamphrang Pohktai hei klam yong ki da e ki i kyrkhu kyrdoh ya ka Kur Sookpoh Khadar Wyrnai deiwa yooluti wa iwon iwon i thmu ka kur u man kiwa jop, wei heiyatoh wa ka Fete wa daw man leh u man ko kawa yoh nong lyngba i noh kyllooid mynsien da waroh kiwa chimbynta.
Heijooh i por kam ki sahep sorkar kiwa kreh neibynta ka imlang sahlang, kular ki leh wow ya krehlang waka Kur Sookpoh Khadar Wyrnai neibynta iwon iwon i emkaam yong ka kur katwa chah i bor yong ki.
Da pynkut ya ka yalang pynlait Ticket Lucky Draw dei kyntien e khublei na u Marryngkat Syngkon wa i ngooh Blai na u Valentidio Paswet, Asst. General Secretary ka Kur Sookpoh Khadar Wyrnai.
Ya kini ki Ticket Lucky Draw daw pynkhle ha ka 26-04-25, heiwa ka Prize wa nyngkong toh daka poisa Rs. 1,80,000, ka Prize wa ar Rs. 60,000, ka Prize wa le ka Rs. 30,000 katwa ki Consolation Prize da em 20 tylli kiwa mar Rs. 1000 kawi.
I dor yong ki Ticket toh Rs. 30 kawi.
Discussion about this post