U Symbood Montri Rangbah ka jylla, u Prestone Tynsong uwa pait leh ya ka chnat Home (Police), ynne hapoh ka yung dorbar hawa e jubab yei rukom krehkaam ka chnat, da pyntip u wa kamwa man kattæ da em 17,650 ngut kiwa kreh pulit (Sanctioned Post) wei ki kreh wa lait man ko 3000 tylli kiwa da sah khlem pyndap da boon snem.
Da pyntip u wa kattæ ka sorkar da khut kreh ko wei da man i iwa lai bait wei daw ye u pyndep ha u Naiynru uni u snem wei kat ha u snem thymme daw ye noh ki pulit thymme wow psiah kreh.
Da ong u leh wa deiwa em kini ki pulit thymme daw ye u booh ki ha waroh ki Police Station, Outpost wa kiwi de ki thaw yow ye u pynkrehkaam hok ya ka aiñ MRSSA.
Kamwa man kattæ da ong u wa ym ye wow pait thij pa thij yei lai i wan ki bru ha ki thaw psiah cha ka jylla wei mar ya dep thung kreh daw ye wow pynlum pynlang yei pyrtuid ki bru wa psiah yow phah cha ki District Taskforce Committee.
Da pdiang u leh wa em hi i slem wow takit kamjooh wow Charge Sheet da ki pulit tangwa da leh ki katwa ye i bor ki.
Heiyatoh wa i thaw sah ya ki pulit, da pyntip u wa daw kyrriah noh ya ka Police Reserve wa em ha Police Bazar, Shillong cha New Shillong wei dang thooh thaw ka chnat Urban Affairs yow chna yung ya ki pulit wei daw pyntikna wow chna ar tylli ki kamra thiah, kawi ka kamra chongke wa kawi ka thaw chet thaw sum.
Neibynta ki pulit wa tympleh diñ namo ki Fire & Emergency Services, da pyntip u wa ka Home Ministry ka sorkar India da mynjur ko wow e yarap Rs. 42 klur yow thied tiar thied tar kamjooh neibynta iwa emkaam hi ki pulit waroh.
Hajrong i dawa wow kyrriah ya ki kari wa chah tyrrah kiwa da ieh cha rood sarok da ki snem khlem da taan ki cheiwon cheiwon hadooh wa da sih dur ka chnong ka thaw, u Prestone da pyntip u wa daw booh noh dei thaw wa kyrpang neibynta kam kini ki kari deiwa ya krehlang waka chnat Transport yow yoh laad ko leh wow dai lilam ki. Wei yeini daw leh ha waroh ki District.
Discussion about this post