Ka yung dorbar chna aiñ ka Meghalaya ynne ha ka sngi pynkut ya ka dorbar mang tyngka, da mynjur ko ya ka Meghalaya State Investment Promotion & Facilitation (Amendment) Bill, 2025, deiwa pyndam noh ya ki kyntien wa ong “Creation of land banks through direct purchase or other means” iwa mut wa ye u thied thaw yow chna ya ki Land Banks neibynta wow seiñ karkhana.
Ya kani ka Bill da wanrah da u Montri Rangbah, u Conrad K. Sangma, uwa da ong wa jooh em ka Single Window Agency tangwa neidaw wa da lai i por kamjooh ki jait karkhana leh da kylla ki kiwa em nadooh neibynta i chait i khiah, ka puræ puthi, i baam i dih, ki kaam uiñke suwari hadooh ki thaw yalehke, kamtæ da emkaam wow booh ki kyndon yow pynsuk ya kini ki jait karkhana wei na ini i daw da wanrah da ka aiñ Meghalaya State Investment Promotion & Facilitation (MSIPF) Act 2024.
Hapoh kani ka aiñ da em boon jait yow pynchlur wei pynsuk ya kiwa wan seiñ karkhana yow poi cha ka thong $10 Billion Economy.
Da pynche u leh wa ka Meghalaya Investment Promotion Authority (MIPA) u pait ko yow yarap u pynyoh thaw neibynta kini ki karkhana. Tangwa kattu won i kaam ko toh wow yarap donhi u seiñ khih ymtoh wow thied thaw deiwa chna da ki Land Bank wei wow e ki cha kiwi won.
Da kular u leh wa manda leh yeini u bood ya ki kyndon ka aiñ Land Transfer Act kmjooh ki kyndon ki Autonomous District Council.
Da ong u leh iwa da pynkylla ha kani ka aiñ u pyntikna leh wa ki tre chnong u yoh kreh ki hapoh kini karkhana heiwa 90% kiwa man kam ki Non-Managerial katwa 50% won ha ki jait kreh Managerial.
Chooh chooh da ong u wa ka sorkar toh kawa ap yeiwa kwah ki paidbah wei ym thombor ko yei mon ki paidbah.
Neiliang u MLA ka Liang Pyrchah, u Ardent M Basaiawmoit leh da wanrah u ya ki kyndon yong oo wa kwah u wow thap tangwa hadien wa pynche chooh chooh u Conrad da pyndam noh u yeini.
Hadien ini neiliang ki MLA wa em ha ka liang synchaar kamjooh ki liang pyrchah da hun ki yeini khamtam yeiwa ap ka sorkar yeiwa sñiawkhia ki paidbah.
Discussion about this post