Ka Little Angels Secondary School, Jowai kawa da sdang yei lehkmen dap 25 snem i lai luti ka skur nadooh u bnai March 2024, haka 24 tarik uni u bnai won da pynhaap pyrda noh ko yei lehkmen heiwa u Wailadmiki Shylla, MLA ka Jowai uwa man leh u Chairman ka MUDA da man u kam u kongsan, ka Baian Blah, Additional Deputy Commissioner, West Jaiñtia Hills District kam ka symbood kongsan, hei emlang ka A.P. Syiem, DSEO, West Jaiñtia Hills, kiwa sikai, ki khynnah skur, ki bei ki pa yong ki khynnah skur, kiwa chah khut sñiawbha wa kiwi.
U Wailadmiki Shylla hawa e yei klam kam u kongsan da yaroh u yei lai luti wei ku kani ka skur neipor cheipor, neibhah kam ka skur ki bru samen hi ymtoh iwa suk u pynlai bait pynlai ryntih ya ka, wei sñiawthooh u wa hap maad chiboon i eh i khoo hei lai luti.
Heijooh i por yaroh u leh ya kiwa seiñ wa sdang ya kani ka skur wa em ki ka mynsien rai kut, mynsien kreh chitom neibynta u e chakri lyngba i stat i tip.
Heiyatoh wei puræ puthi ong u wa wot neiliang ka sorkar leh em ko i angnood wow kyntu kynrong ya ka, kamtæ neibynta ki skur samen leh pyrchang ko u e kyrchaan katwa jooh wa jam i bor, wei neibynta kani ka skur leh da yarap ka sorkar hei dur ka Science Grant wa neibynta u næ kawa sikai da kyrchaan su tulop da ka sorkar.
Hanla kattæ leh ong u sñiawthooh bait ym pu man iwa biang dang boon i emkaam wow pyntoh pyntne.
Kamtæ da em i yaklam hapoh ka sorkar heiyatoh wa i puræ puthi, wa kamwa im katni haka juk yakob kawa joor bha, na itæ i daw kitu ki skur wa ye u leh bha hap u tipmit kyrpang ya ki, katwa ya ki wym ye u lehbha won hap wow sylli bniah wa ha iwon i rukom wow leh.
Ha kani ka sngi da em leh i chaad i rwai wa chimbynta da ki khynnah skur, wei da saam Prize leh cha kiwa jop ha i yakob waphær waphær wa da pynman ha ki chisnem lynter kam chibynta i lehkmen dap 25 snem, deiwa wan chimbynta lang kiwi tawon ki skur.
Heijooh i por da pynkup burom haroh ka skur ya ki khynnah wa lehbha hei puræ puthi, kamjooh kiwa yoh rah naam hei kyrdan waphær waphær.
Discussion about this post