U Montri sorkar uwa man leh kam uwa e ktien ka sorkar MDA-II uwa pait leh ya ka chnat Social Welfare, u Paul Lyngdoh da ong u wa ka sorkar daw chimkhia ko lada yoh pdiang ya ka ujor wa lada em ki seiñ kiwa lai yah ya ki khynnah cha baar ka jylla.
Ini i ong u Montri toh hawa kylli hajrong i dawa wow takit ya ki bru kiwa lai yah ya ki khynnah wow lai skur cha baar ka jylla, kawa emyatoh wa iwa jia ya ki khynnah skur wow lai puræ ha Karnataka.
Da pdiang u wa em hi kiwa lai yah ya ki khynnah, tangwa da ong won u ym em wa ujor yeini wa em kiwa lai yah ki cha Karnataka.
“I emkaam i wow yoh ya ka ujor neibhah wa ye u man toh deiwa yoh bor na ki bei ki pa næ na kiwa ha-yung ha-sem, ya iwa ka sorkar em ko i bynta wa khian tam wa ye ko wow leh, tangwa lada em kiwa ujor wa tikna wa ki khynnah chah pynbor ki wow pynkylla niam, i u chimkhia bha i ya kitæ ki ujor. Kamtæ i emkaam i wow yoh ya ki ujor kiwa tikna”, da ong u.
U Montri da kyntu u leh ya waroh kiwa em i sñiawkhia, khamtam kiwa yahkhmat chnong ha ki thaaiñ palatsor wa toh u pyntip ki cha ka sorkar jylla wei neiliang ka sorkar deilang ka chnat Social Welfare yow ye ki wow chimkhia ya waroh ki ujor.
U Paul da ong u wa ka sorkar da booh ka thong wow pyntikna wa chngaaiñ ya waroh kiwa chong chnong ka jylla kiwa lai puræ cha baar, wei na ini i daw da phah ya u Commissioner & Secretary ka cnat Home Political wow lai pait u ya ki khynnah kiwa chah sumaar, hadien wa khlaad noh ar ngut nei baam yei baam wa da man bih.
Da ong u neiliang ka sorkar daw leh lut ko ya waroh kiwa toh u leh khnang yow chem yei yong sakhiat hajrong i khlaad noh ki khynnah ar ngut ha Karnataka wei dang yang ya ka Report na u Commissioner & Secretary uwa daw e ka ha u Symbood Montri Rangbah wa pait ya ka chnat Kaam Pohyung wa cha u Montri Rangbah yow chim ya ka rai.
Discussion about this post