Ka yung Digital Library wa nyngkong dooh hapoh ka Laskein Block wa tip kam ka Children Adolescence and Digital Library wa da chna ha chnong Sahsniang-A da ka VEC ka chnong Sahsniang-A chirup i yakrehlang ka yung krehkaam u BDO ka Laskein Block, ka yung krehkaam u Deputy Commissioner ka West Jaiñtia Hills District lyngba ka chnat DRDA da ye wow wai paidbah ya ka ha ka 3 tarik uni u bnai da u kongsan, u F.B. Basan, Additional Deputy Commissioner, West Jaiñtia Hills District uwa man leh u Project Director ka DRDA hei emlang u Dr. F.R. Shadap, BDO Laskein Block kam u symbood kongsan.
I wai ya kani ka yung da man kawa yoo phooh yoo phieñ dei wan sakhilang kiwa kreh ka Laskein Block, ki Gram Sevak, ki BTA, kiwa kreh napoh ka chnat DRDA, u Secretary chnong Sahsniang-A, u F. Kamar, ki paidbah wa chong chnong, kiwa sikai, ki khynnah skur wa kiwi.
Kani ka yung toh ka wow yoh ki khynnah skur yei stat i stat lyngba i em ki Computer kamjooh ki kot sla, wa deiwa wan puræ ki ya ki kot ha kani ka yung daw yoh ki chiboon i stat i chemphang.
Ha ka yalang wa pynlai da u Waheh Chnong ka Sahsniang-A, u D. Ymbon da pynsñiaw u leh i sñiawngooh ya ka yung krehkaam u BDO wa ka DRDA hajrong i pynyoh ya kani ka yung ka wow man i kyrkhu ya ki khon ka chnong heiyatoh wa i stat i tip katkam wa yah ka juk ka por.
U BDO, u Dr. F.R. Shadap hawa e yei klam ong u neini chakhmat manda poi chooh chooh ki kot, ki Computer, yooluti u wow man sakhiat ka laad wow yarap e bor e mynsien ya ki khynnah skur khnang wa ka Laskein Block u ku ko hei puræ puthi.
Neiliang u F.B. Basan hawa klam da e khublei wei yaroh u ya ka VEC Sahsniang-A, wa man ko kawa chimkhia bha u pynkreh ya kiwon kiwon ki Scheme wa yoh na ka sorkar wei ye ko leh u pyndep heipor wa smat.
Hawa klam e mynsien ya ki khynnah skur ong u phi ki khynnah dang emkaam bha phi yei stat i tip, wei i stat i tip wan i lyngba deiwa puræ ya ki kot, ym du deiwa puræ hi-eh ya ki kot skur tangwa yow tip leh yei man i long ha kylleiñ ka pyrthai.
Chooh choh ong u ki khynnah kiwa yoh u lai skur man ki kiwa embhaah tam, neibhah du lyngba i stat i tip u ye u pyndooh pyndam yei sih wa boonjait, wei lyngba i stat i tip ye u pynku ya ka chnong ka thaw, ka ri wa ka jaitbru.
Kamtæ hawa kyntu u ya ki khynnah skur wow khreh kot bha ki, kyntu haroh u ya kiwa sikai leh u yarap ki ya ki khynnah yow man kiwa minot hei puræ puthi yow wanrah yei naam i burom.
Discussion about this post