Da soi soskular yow thap yei ktien Khasi wa Garo hapoh ka BHASHINI

Kam chibynta wow thap ya ki ktien hapoh ka stat Technology, ka sorkar Meghalaya da soi soskular Memorandum of Understanding (MoU) ko wa ka Digital India Bhashini Division ka Ministry of Electronics and Information Technology (MeitY) ka sorkar India yow thap yei ktien Garo wa Khasi ha ka rynsan namo ka App wa tip kam ka BHASHINI.

Yei soi soskular da leh deiwa emlang u Montri Rangbah, u Conrad K. Sangma wa u Montri ka chnat Art and Culture, u Paul Lyngdoh wei da sakhi leh ki dkhot ka Khasi Literature Society wa ka A’chik Literature Society.

Ka BHASHINI toh kawa da sdang hapoh ka Digital India Programme yow pynsuk u ya sñiawthooh uwi ya uwi wei da em chwa hapoh kani 22 tylli ki kyntien wa em ha India wei deiwa emlang ka ktien Garo wa Khasi daw man ka Meghalaya kam kawi ka jylla wa em hapoh kani ka rynsan.

Ka ktien Khasi toh kawa da em chwa hapoh kani ka Bhashini App katwa ka ktien Garo won da sdang wow thap ya ka deiwa pynemkaam dei stat AI wei deiwa khlan u pynemkaam ki bru daw pliah chooh chooh ka AI u tip chaphang kini ki ar tylli ki ktien.