Ha ka 22 tarik uni u bnai da em i chah hiar thma ki bru paidbah wa uiñke suwari ha Pahalgam heiwa da chah siat yap hadooh 26 ngut ki bru.
Hadien ini, ha ka 23 tarik, uwi u chipai Constable ka Border Security (BSF) ya uwa tip kam u Purnab Kumar Shaw da toh kaap bakla u ya u Zero Line ha Ferozepur Sector wei ini da pynman ya ki chipai Ranger ka Pakistan wow ksoh noh ya oo.
U Purnab toh uwa na Rishra, Hooghly District ka jylla West Bengal heiwa da lai kreh (Posting) u ha 182nd Battalion ka Border Security Force ha khappood ka Ferozepur wa em ha Punjab.
Ynnin i janmiet ka 28 tarik, ka kurim u Purnam kawa pun-khon chirup wa u khon wa kiwa ha-yung da poi ki ha Chandigarh wow yachem wa ki heh ka BSF wei wow tip yei man i long yong oo heiwa da ong ya ka wym toh u khuslai ko wei daw leh katwa ye yow pynpoi yung oo tangwa ym em yoh ko yei jubab wa hun.
Ka kurim u Punab da ong ko wa da kwah ko leh wow yachem wa u Home Minister ka ri heiyatoh wa ini tangwa ym em yoh ko.
Hajrong kini kiyi kiyi, ka Congress lyngba u heh ko, u Pawan Khera uwa khlieh ya ka Media and Publicity Department ka Party ynne da kylli u wa la 6 sngi wa chah ksoh u chipai BSF ha ki Ranger ka Pakistan wei iyi wa da leh ka sorkar hajrong ini.
Discussion about this post