Hadien wa sdang poor i kynaad hapyrdi ka India wa Pakistan, ka sorkar Meghalaya da chim ko ki laad ki luti wow pyntikna wa ki mar baam ym duna ki lada jia wa joor ka thma.
Neiliang u Montri ka chnat Food & Civil Supply, u Comingone Ymbon ynne ka sngi da chong ya syllok u wa ki sahep sorkar ka jylla yow bichaar wei wow pyntikna wa ki mar baam ymtoh u duna ki lada mih iwon iwon i jia wei ymtoh wow ktah ya ki paidbah.
Hawa klam hadien ka yalang, u Comingone da pyntip u wa kamwa man kattæ ym em iwon iwon i eh iyi iyi neibhah ki mar baam da biang lut ki yow pyndap ya ki paidbah ka jylla.
Da ong u wa waroh ki DC wa ki SDO da pyntip ki wym em iyi iyi i duna wei ki mar baam dang pahooh.
Hawa kylli, u Montri da pyntip u wa i emkaam khoo na ka sorkar India wei da yoh kamwa 12000 Metric Ton neibynta u pyndap baam ha ka jylla.
Da ong u leh wa hanla ka sorkar India ym pu em pynmih ko ya kawon kawon ka hukum tangwa ka sorkar jylla kwah kow pynkhreh chwa yow pyntikna wa kiwa chong chnong ym chah ktah ki.
Kamtæ da kyntu u ya kiwa chong chnong ka jylla wym toh u khuslai wei wow thied deiwa tieñ ya duna mar baam neibhah wa man ki kiwa pahooh.
Da pynrap u wa ki paidbah ye ki wow Phone ha u Helpline Number 1967 lada chem ki ya iwon iwon i eh.
Discussion about this post