Kam ka dak wow burom ya ka sngi kyrpang ki manbei kiwa da chah chitom hei lai luti hanla hap maad ya boon i eh i khor hei im ki, ha ka 10 tarik uni u bnai, ka National People’s Party Women Front, Jowai Block da chim ko ya ka bynta wow leh burom ya ki manbei ha ka yalang wa da pynman ki ha Community Hall ka Lion Mission Compound, Jowai.
Ha kani ka sngi leh burom da wan sakhilang u MLA ka Jowai, u Wailadmiki Shylla uwa man leh u Chairman ka MUDA kamjooh u State Working President NPYF kam u kongsan, hei emlang u Octomewot Lamin, District President NPP WJH, u Reformingson Lamare wa u Krison Langstang, ki MDC ka JHADC, kiwa yahkhmat ka chnong ka Lion Mission Compound Dorbar Chnong kiwa chah khut sñiawbha wa kiwi.
Ka Tngenris Sutnga, Ex-President Trained Nurse Association of India kam kawa chah khut sñiawbha wow e i klam ong ko wa ha kam kani ka sngi toh u kynmoo leh ya ki manpa wa em nadien wow e i kyrchaan neibynta wow jop i lai luti ki manbei.
Ong ko kam ka bei katwa tip i buit i bor toh u pynyoo nongmuna wa bha ya ki khon lada kwah u bha u miat ki khon. Wei kamwa ka ktien leh ong ko sikai ya u khynnah nadooh dang khian khnang wa hadooh wa heh leh u bood u yeitæ.
U Octomewot Lamin kam u symbood kongsan hawa pynsñiaw i sarong wow yoh yieñ klam neibynta ka bei ha kam kani ka sngi kyrpang yong ki manbei ong u, “Yieñ O heini wow ong khublei chiboon bei yeini i im wa da e ph ha i, wei ym du i im tangwa kamjooh i dur wa kammon u im i, wa i maya wym em kyndon”.
Wei kam ka bei lada em i bakla ki khon leh sneiñ pynyoo pynkdaw ko dei maya ya ki khon.
Tangwa kam ki khon won im i ha ki sngi wa teiñ teiñ jooh pynyoo bor i ya kiwa pynheh pynsan wei saiñdur yei rynyieñ yong i.
Neiliang u Wailadmiki Shylla won hawa e yei klam ong u, i kynmoo burom ya kani ka sngi toh wa kwah sakhiat u e i burom ya ki manbei kiwa da chah chitom ya chiboon ki kaam.
Heiyatoh i tipmit i pynkup bor ya ki manbei sñiawkmen u wa ha ka jaitbru Pnar katkam ka dustur riti da em chwa i tipmit i pynkup bor kyrpang ya ki nadooh warim, hachwa wa ka ri India u tipmit u pynkup bor ko ya ki kynthai ki manbei.
U Wailadmiki Shylla ong haroh u wa ha kam kani ka sngi ymtoh leh u myllin wa ka ri yong i em ko hapyrdi i yaleh thma wa ka Pakistan.
Wei kam ka dak wow burom ya ki chipai ka ri wa dang em hapyrdi i yakhun thma khlem pyrkhat de yei im neibynta u yada ya ka ri, da khutlang u ya waroh kiwa em ha kani ka sngi wow ya suki chipor deiwa dem ki khlieh.
Kamtæ kyrpaad haroh u wa lada tip ya ki manbei wa em khon chipai wa dang yakhun kattæ, ymtoh u mylliñ e khublei sngi kyrpang ya ki wa da kha ki ya ki khon dap chynrang dap kynthai, boi ki khon yong ki ym em por de ki kattæ u e khublei ya ki bei yong ki katwa dang em ki hapyrdi i yaleh neibynta u yada ya ka ri.
Heijooh i por leh kam uwa da dooh noh ya ka bei na sla kani ka pyrthai, ong u wa i yoh u wow e khublei ya waroh ki manbei ha kani ka sngi sñiaw u kamwa yoh hi u wow e khublei ya ka bei yong oo kawa da khlaad.
Discussion about this post