Ki e sikai wa tip kam ka Assistant Masonry kawa neibytna kiwa chna yung khyndaw-bilat, ka Assistant Electrician kawa man ka e sikai taan bordiñ cha ki yung ki bru wa ka Basic Cooking Skills kawa e sikai chet baam Hotel wa da leh da ka Greta Solutions Training Academy, da pyndep ki ha ki le tylli ki thaw namo ki Training Centre wa em ha Sohmynting, Mihmyntu wa ha New Hill, Jowai kiwa da kyrchaan poisa da ka Meghalaya State Skills Development Society (MSSDS) hapoh ka Skill Meghalaya.
Ya kani ka Training da pynlai hei pait u Sonjoy Shylla, Centre Head In-charge yong ka Greta Solutions Training Academy, Jowai wei yei pynkup burom wei saam Certificate cha kiwa da pyndep yei sikai da emlang u Lambormi Suchen, Skill Development Officer (SDO), West Jaiñtia Hills, u F. Passah MCS, Assistant Commissioner yong ka West Jaiñtia Hills Districts kam u kongsan wei kamjooh leh u Brave Star Phawa, waheh chnong ka Sohmynting wa u Jerry Anderson Suting, General Secretary Dongneiñ ka chnong Sohmynting katwa ha Mihmyntdu da emlang u waheh chnong, u Abul Phawa.
U Skill Development Officer hawa e yei klam da e mynsien u leh ya kiwa da pyndep yei sikai yow nang kreh chitom chooh ki yow nang ku ki chakhmat lada ha iwon iwon i thaw wa kreh ki, wei da ong u leh em kamwa 63 tylli ki jait Training kiwa em hapoh ka West Jaiñtia Hills District wei em leh ki jait kaam kiwa cha baar ka ri manda dep ya kiwi ki jait Training.
U kongsan da e khublei u ya kiwa chah sikai wa da ye ki wow pyndep deiwa ong wa lada bien ki wow kithkhia ya kiwon kiwon ki kaam wa da jied ki wei wow pynpliah leh ya kawi, daw man ko ka myntoi yow yoh ki yei yaroh kamjooh deiwa kyntu leh wow syndong bha manda kreh ki yow lait nei mynsoo.
Da ong u leh wa kmen u wow yoo wa chimkhia kiwa ya chimbynta wei da kitbok kitrwiang u ya ki wow nang lehbha ki sam chakhmat.
Neiliang won u waheh chnong ka Mihmyntdu da e mynsien u ya kiwa chimbynta.
Waroh kiwa da pyndep yei chah sikai ha kani ka kynti da em ki 151 ngut ha ki le tylli ki jait kaam.
Ka Greta Solutions Training Academy da e ko chiboon ki jait e sikai hapoh ka West Jaiñtia Hills wa kamjooh cha East Jaintia Hills wei ki jiat Training kiwa da e toh nadooh wow chet Cake (Craft Bakery), i sikai chet baam (Street Food Vendor Stand-Alone), i sikai chna bordiñ (Assistant Electrician), i e sikai chna yung Building (Assistant Masonry), i sikai wow pynmiat pynbha sniooh (Hair Dressing & Stylist), ka sikai pyndait na Solar ha Battery (Solar Technician), i sikai kammon u chna Chips, Wine, Achaar (Food Processing) kiwa man mar le bnai ka e sikai.
Discussion about this post