Ka yalehbol wa tip kam ka Friendly Match wa pynman da ka Sports and Youth Sub-Committee ka War Jaiñtia Student Union ha madan Pdengshakhap, Amlarem Civil Sub-Division ha ka 24 tarik uni u bnai da man ko kawa chongchit wei yoo phooh yoo phieñ lyngba i wan sakhi ki paidbah wa boon soodong ka madan, kamjooh leh i wan rwai pynchongchit ka “Khmih Creative Society” kawi na ki kynhun rwai wa bna naam ka jylla Meghalaya.
Ka yalehke wa da pynman toh hapyrdi ka Rangdajied United FC pyrchah ya ka War Jaiñtia XI, wei ka yakhun ha ka kylla step man ko kawa yatoh bor neibhah wym em wa yoh u pynkhih jaar.
Kamtæ ha ka kylla miet won ka War Jaiñtia-XI da sai ko yei buit i bor hadooh wa yoh thap kool hadooh 4 tylli, iwa mut da jop ko da 4-0 ya ka Rangdajied United FC.
Ya kitai ki 4 tylli ki kool da thap da u Shano Tariang ha ka minit wa 59, ar tyll ki kool won da thap u phrangki Buam ha ka minit wa 65 wa 75 katwa u Jefferson Pakyntei won da thap u chi kool ha ka minit wa 68.
Ha ka yalang tbian yong kani ka sngi, u General Secretary ka WJSU, u Everest R Langstang da pynsñiaw u chiboon ki kaam wa bha wa ka seiñ da leh ko, wei daw pteiñ chooh chooh ko chaphrang, la heiyatoh wow pynku yei kaam Sports, i puræ puthi, najrong kiwi won ki mat yong ka imlang sahlang ka thaaiñ hi waroh kawi.
U Chief Adviser ka seiñ, u Alban K Gashnga da pynsñiaw u i sarong ya ka WJSU wa da chim ko ya ka luti wa bha tam neibynta ki khon khynroo khyllood ka War Jaiñtia yow yoh rynsan ki u sai yei sap wa pynyoo cha ka pyrthai.
U Symbood Kongsan, u Ombormi Tariang, President ka Jaintia Youth Federation CB Jowai ong u, wow pynman kat kani ka lympung ymtoh iwa suk, tangwa toh dei embynta u Blai wa yahluti ya kiyi kiyi waroh.
U Wansuk Lamin kam u kongsan yong kani ka sngi hawa klam da yaroh u ya ka seiñ WJSU wa da kreh chitom sakhiat ko wow pynman kam ka thong wa da mut da mang, wei kini ki kaam yong ka WJSU da man leh ka parom wow sah kynmoo hapoh ka War Jaiñtia Amlarem Civil Sub-Division.
Kyntu haroh u ya kiwa ksoh kaam ka seiñ wow nang kreh chitom chooh chooh ki hanla hap maad yei eh hei lai luti deiwa em i kyrmen wa ha iwon iwon i por næ ka sngi wa i thmu wa bha u mankaam ki.
Ha kani ka sngi neiliang u Dei Syad, Chairman ka Sports & Youth Sub-Committee ka WJSU da pynbna paidbah haroh u wa ha u bnai October daw pynman ko ya ka Under-16 Tournament ha chnong Pamtbuh kam ka dak wow pynkhlan chooh chooh yei yalehbol hapoh ka thaaiñ. Wei na kani ka Under-16 Tournament daw jied ki 32 ngut kiwa yalehke wow lai pynpliah cha ka SAI Shillong Meghalaya.
Discussion about this post