Neidaw wa joor palat u slap wa ka la’ær nadooh ka 28 uni u bnai heiwa dang pteiñ hadooh ynne ka sngi, da chah ktah ka chnong Bataw kawa haap hapoh East Jaiñtia Hills District heiwa da em ki yung ki sem kiwa da chah khyndang ha ka la’ær.
Kini ki yung kynthup ki yei yong ka Meriki Lyngdoh kawa em 5 ngut hapoh kani ka manyung wa i yong ka Phur Sumer.
Yeini wa jia da lai pait leh da ki bor ka chnong ynne hapoh i yahkhmat u Secretary Chnong, u Nehlang Suchiang wa u Macdonald Suchiang, Assistant Secretary heiwa da chem ki wa man sakhiat i dooh nong ya kini ki manyung kiwa da hap wow sah chipor cha ki yung ki para marjan.
Neiliang u Waheh Chnong ka Bataw, u Deihok Sumer da ong wa da pyntip yeini wa jia cha ka yung krehkaam u BDO Wapung C&RD Block, u Dr. T. Shylla lyngba u Niawki Shylla kam u Gramsevak ka Bataw Circle wow pynyoh yarap na ka sorkar ya kini ki manyung kiwa da maad yeini i jia wa sñiawsih hei bor ka bei ramaw.
Da pyntip wa hadooh kattæ leh u slap ka la’ær deilang wa ka pyrthat dang joor ki, kamtæ da kyntu ya kiwa chong chnong wow man ki kiwa husiar wei wow kiar u lai bri cha ki thaw wa em harood wah khamtam chajan ka Power House Leskha neidaw dang em leh i pynlait um kamwa da pyntip da ka yung krehkaam u Executive Engineer, Myntdu Leskha Civil Division, MePGCL, Nohkum.
Discussion about this post