Ka Meghalaya State Disaster Management Authority (MSDMA) da pyntip ko wa em chiboon wa chah ktah ha u slap wa ka la’ær nadooh ka 29 tarik u Naisan hadooh ynne ka sngi.
Ki District wa da chah ktah kynthup ki ya ka East Khasi Hills, West Garo Hills, Eastern West Khasi Hills, Ri-Bhoi, South Garo Hills, West Jaiñtia Hills, South West Garo Hills, East Jaiñtia Hills, South West Khasi Hills wa West Khasi Hills heiwa da em 49 tylli ki chnong ha ki 23 tylli ki Block wei palat 1,221 ngut ki bru wa da chah ktah.
Ha kini ki le sngi wa dadep da em 6 ngut wa da yap wei 4 ngut wa mynsoo neidaw u slap wa ka la’ær.
Chooh chooh da em 28 tylli ki yung wa da pra wei da chah ktah leh ki sarok wa kiwi kiwi kamjooh ki thaw rep.
Ynne ka sngi da em i oor khyndaw ha u sarokbah NH-6 ha Kuliang, East Jaiñtia Hills wa ha u sarok Umjari-Umtrai ha Ri-Bhoi District yeiwa da ye noh wow pynkhooid hadien kattu katni kynta.
Neiliang ki bor sorkar da ye ki wow pynpoi ya ki tiar yarap khamtam ya ki manyung ha Dehal Bagan wa Upper Bagan ka Umling C&RD Block, Ri-Bhoi District heiwa da embynta leh ki bru paidbah na ki chnong wow yarap ya kiwa chah ktah.
Discussion about this post