Ka Jaiñtia Students’ Union (JSU) seiñbei da e khublei ko ya ka sorkar MDA-2 wa yahkhmat ka NPP lyngba u Montri Rangbah ka jylla, u Conrad K Sangma wa da ap ko yei e buit ka seiñ wow pynmih da ka Evening Section ha Kiang Nangbah Govt. Higher Secondary School, Jowai khnang wa ki khynnah wa dooh thaw puræ Class-XI ha ki skur sorkar u yoh thaw puræ ki.
Ka JSU ym em leh mylliñ ko ya ka A.P. Syiem, District School Education Officer, West Jaiñtia Hills kamjooh ya u Deputy Commissioner ka West Jaiñtia Hills, u Abhinav Kumar Singh.
Katkam i pynbna sorkar wa da pynmih lyngba ka chnat Education, da pyntip wa da pynlait ya ka poisa kawa mar Rs. 12,60,000 wow thung kreh Contractual wa ar snem neibynta ki Assistant Lecturer kiwa mar 7 ngut ha Kiang Nangbah Govt. Higher Secondary School, Jowai wa ha Williamnagar Govt. Higher Secondary School, Williamnagar.
I su man ko Rs. 15,000 chi bnai uwi u Assiatant Lecturer ya kini ki ar tylli ki Higher Secondary School ka sorkar ha Jowai wa Williamnagar neibynta ka Arts Stream (Evening Section).
Discussion about this post