Hajrong ka thong u pynku yei leh Yoga kawa da tipmit da ka pyrthai hi waroh kawi neibynta u yoh yei chait i khiah, ynne ka sngi da man ko ka lyngkhooh dap 11 snem wa da tipmit ha kylleiñ ki ri kam ka International Yoga Day kawa da lehkmen hajrong ka phang “Yoga for One Earth One Health”.
Kamtæ neiliang ka yung krehkaam u Deputy Commissioner ka West Jaiñtia Hills chirup i ya krehlang wa ka yung krehkaam ka District Hub for Empowerment of Women kawa haap hapoh ka chnat District Social Welfare, West Jaiñtia Hills District deilang ka Yoga Cell, ka NSS Cell wa NCC Unit yong ka Kiang Nangbah Government College, ka NCC Unit ka Tome Memorial Higher Secondary School Jowai wa kiwa sikai da chimbyntalang ki wow leh Yoga ha Yoga Centre ha Indoor Hall ka Kiang Nangbah Government College.
Ya kani ka leh Yoga da yahkhmat da u Hercules Toi, Member Secretary Yoga Cell, uwa da ong leh wa ya kani ka Yoga da e sñiawbha da ka ri India cha ka pyrthai, heiwa lyngba i yoo jngai u Narendra Modi da pynpsiah u ka haka United Nations ha u snem 2014 wei ha u 2015 won da pynbna ka United Nation wa ha ka 21 tarik u June man-u-snem toh ka sngi kynmoo burom neibynta i chait i khiah ha ka pyrthai hi waroh kawi lyngba i leh Yoga.
Da ong u leh wa i leh Yoga najrong wa yarap ko u pynyoh yei doh i pran wa chait wa khiah yarap ko leh u pynchait yei bor pyrkhat pyrdaiñ u bru.
U GLC Mylliem, Assistant Commissioner, WJH hawa pynsñiaw yei emkaam i leh Yoga hei im wa man-ka-sngi, yooluti u leh wa i leh Yoga toh u pynmyllien ki man-ka-sngi ym du kat ha ka sngi kyrpang donhi.
Discussion about this post