Ka Supreme Court ka India da kyntait ko wow ap yei e daw u chipai Black Cat Commando wei da phah ya oo wan wan pyndem u neibhah wa pynyap u ya ka kurim u neidaw ka poisa Dowry iwa da jia 20 snem nachwa. Uni u Commando hawa yasaaid da e daw wa oo embynta u ha ka Operation Sindoor.
Hadien wa kyntait ka yung bichaar yeini, neiliang ki muktiar u da e daw ki leh wa da chakri u kam u chipai ka Rashtriya Rifles la 20 snem.
Neiliang u Justice Bhuyan da ong u wa ini i e daw ym man iwa biang hadooh wow pynlait na ka aiñ ya ki kaam wa da leh pyrchah aiñ pyn hapoh ka yung ka sem deiwa ksiah pynyap pyn ya ka kurim.
Yei bichaar da leh da ka miej u Justice Ujjal Bhuyan wa u Justice Vinod Chandran hawa ap ya ka mukotduma Special Leave Petition wa da yaleh pyrchah ya ka hukum ka Punjab & Haryana High Court heiwa da dawa wow pynlait na ka hukum phah wan pyndem kat wym pu dep ka Supreme Court wow bichaar yeini.
Hachwa ini, ka Punjab & Haryana High Court da kyntait ko yei kyrpaad uni u Commando deiwa phah bait wow kset ya oo 10 snem.
U Justice Bhuyan da ong u wa kani toh ka kaam pynyap bru deiwa pynyap pyn ya ka kurim, wei kiwa wan chakhmat yow kyrpaad toh kiwa da phah chah kem 6 bnai, 3 bnai wa chi snem.
Ini i kaam pynyap bru toh iwa da jia ha u July 2004, heiwa u Baljinder Singh da chah rai pynrem u ha ka Trial Court ha Amritsar ha Section 304-B IPC yei pynyap ya ka kurim u hadien wa dep bia ki ar snem. Katkam ka mukotduma pyrchah ya oo, da pyndik pynchitom u ka ka kurim u deiwa dawa Dowry wei hadien da pynyap u ka.
Hadien ini da kset ya oo le snem wei da lai booh u ya ka Appeal ha ka High Court heiwa da phah pynsangeh yei phah kset u chipor wei da yoh u wow mih patok.
Hadien kamwa 20 snem won ha u bnai May uni u snem, ka High Court da kyntait ko ya kani ka Appeal wei da pynksan ko yei phah chah kset ya oo 10 snem deiwa maap du ya ka kuna, kamtæ da lai u cha ka Supreme Court kawa da rai pyrchah ya oo deiwa e por wow wan pyndem u hapoh ar tayaaw.
Discussion about this post