Hei janmiet ka 22 tarik uni u bnai, kiwa ksohkaam ka Party UDP 4-Mowkaiaw Constituency deilang kiwa kyrchaan da pynman yalang ki ha Dorbar Hall ka chnong Mowkaiaw yow chim yei rai u mih noh na ka UDP deiwa bood ya u MLA, u Nujorki Sungoh yow psiah cha ka NPP.
Ha ka yalang wa pynlai da u Laiwan Lamare, neiliang u Rev. D. Tang da yahkhmat u wow ya suki chipor kam ka dak u ya duwai neibynta u MLA ka 4-Mowkaiaw Constituency, u Nujorki Sungoh uwa em hapyrdi i chitom yow smat yoh u yei chait i khiah.
Ha kani ka yalang hadien wa u General Secretary ka UDP 4-Mowkaiaw Constituency, u Onyx Suchiang da pynsñiaw u ya ki mat yalang, neiliang u President ka UDP 4-Mowkaiaw Constituency, u Eleazer C Dkhar uwa da ksoh yei kaam nadooh u 2017 hadooh 2026 hawa klam pynsñiaw u ya ka yurim wa skem yong oo nadooh wa ksoh kaam u hapoh ka Party, tangwa iwa pyndiaw ya oo won toh wa nadooh wa jop u Nujorki Sungoh kam u MLA la ar sien kattu nadooh u 2018 leh ym em e bynta ka UDP ya oo wow man kam u Cabinet Minister.
Hawa khana bniah ya ki daw ong u wa heipor wa jop nyngkong u Nujorki Sungoh kam u MLA ka 4-Mowkaiaw Constituency, kiwa yahkhmat ka Party UDP deilang u MLA da yaklam ki hakhmat u (L) Dr. Donkupar Roy Lyngdoh uwa man u President ka UDP Central Body ha itu i por wow e bynta man Minister ya u Nujorki Sungoh neibynta i myntoi ka Constituency wa ka jylla wei ha katai ka por u President da kular u yow e hadien ar snem chitein̈ wei da chaniah ki yeitæ khlem iwon iwon i thoh, najrong wa u (L) Dr. Donkupar ong u ym dam de u e neidaw wada mihsalan u hei pyrtuid u pa yong oo, u (L) Mihsalan Suchiang uwa man kam u MLA warim ka UDP heijooh i por leh man u kam u Founder ka Party UDP.
Tangwa sñiawsih ki wa jia tyngkhooh noh i yap u (L) Donkupar Roy wei da jied President thymme noh ya u Metbah Lyngdoh uwa ksoh leh yei chuki Speaker.
Hadien wa ksoh President u Metbah leh da lai yachem ki wa oo wei pynsñiaw yei yi wa da yaklam ki wa u (L) Donkupar Roy heiyatoh i yoh bynta Cabinet Minister, najrong wa pynsñiaw ki leh yei dawa pynku kyrdan ya ka Laskein C&RD Block cha ka Civil Sub-Division.
Tangwa ini da kut heh i neidaw wym ap wym sñiaw ki, heiwa kiwa yahkhmat UDP na 4-Mowkaiaw leh suki noh ki wei yaichah hi-eh.
“Heiyatoh wa i dawa pynku kyrdan ya ka Laskein Block cha ka Civil Sub Division, neiliang u Nujorki Sungoh leh da pynsñiaw u ha u Metbah Lyngdoh tangwa iwa phylla wa da yoh pathan da ka District thymme ha Constituency yong oo, katwa yei hok yong i won suki hi-eh u,” da ong u Eleazer C Dkhar.
“Chooh chooh hadien wa ki paidbah da pynjop biang ki ya u Nujorki Sungoh ha u snem 2023 da em i yaklam ha Office ka UDP wow yoh noh u ya ka chuki Minister ha deilang ka sur kiwi ki MLA wa kiwa yahkhmat ka Party tangwa da mih pyrtuid won da kiwi ki MLA wei dooh noh u Nujorki. Ini pynyoo yei wym kheiñkor u President, u Metbah Lyngdoh ya u MLA yong i wa ya ki paidbah wa kyrchaan ya ka UDP na 4-Mowkaiaw Constituency”.
“Neitæ hadien wa dap ar snem chiteiñ leh ym em hi bna ki ya u MLA yong i, wei la toh wa pyrkhat sakhiat ki da toh u e hi hawa na Jaiñtia du 3 ngut ki MLA UDP, wei kiwi ki para MLA UDP yoh chuki Minister ki hadooh ar sien wot hawa ya jop lang mar ar sien,” da pynrap u Eleazer C Dkhar.
Kini toh ki daw wa pynman ya kiwa yahkhmat ka Party kamjooh kiwa kyrchaan UDP na 4-Mowkaiaw Constituency u mih noh ki na ka UDP.
Wei i rai ki wow bood ya u MLA cha ka NPP toh dei yooluti u yoh myntoi ka Constituency wa ki paidbah heiyatoh ki kaam pynroi ha ki chnong ki thaw, neibhah wot ya ka Laskein C&RD Block leh da kular pynku kyrdan noh cha ka Civil Sub-Division da u Montri Rangbah, u Conrad Sangma wa ar ngut ki Deputy CM, u Sniawbhalang Dhar wa u Prestone Tyngsong.
Hajrong ini i mih wei rai psiah cha ka NPP ong ki wym em de sihlet ki neibhah wa da kot ki u yaichah nadooh u 2018 hadooh u 2026.
Weiwa yoo ki wa ka NPP toh ka Party kawa yoo jngai wei pyrkhat jngai neibynta i roi i paar neibynta i myntoi ki paidbah.
Heijooh i por leh rai ki wow e kyrchaan pura ya u Dr. DRL Nonglait ha kani ka By-Election MP.
Ha kani ka yalang da yoh leh i klam na u Bhawan Chyrmang, Ex MDC, u Kartos Saioo, u Experience Timung, ka Kyntu Suchiang, u Ford Ryngki, u Rangdajied Lapasam, u B. Shadap wa kiwi.
Discussion about this post