Kawi ka kynthai da khlaad noh ko hadien wa da chah na rdang da ka tari ha uwi u bru ynne ka sngi ha Pyndengumiong, Mariang ka Eastern West Khasi Hills.
Ini da jia i heipor wa dang emlang u pa kani ka bru wei katkam ka khubor wa da yoh, ini da jia i heipor kamwa 5:00 waje i janmiet hawa kani ka kynthai wa tip kam ka Phyrnailin Kharsyntiew (27 snem) kawa na chnong Mawkhap Mawkynrang, Eastern West Khasi Hills dang em ko hapoh kawi ka thaw pynyieñ kari kawa pynlai da uwi u bru samen.
U pa yong kani ka kynthai, u Sarding Mairang da khana u wa ka khon yong oo da pyntip ko wa da kwah noh ko wow pynlait chan wa uni u bru wa tip kam u Roberto Marngar (25 snem) wei oo kam u pa da kylli bniah u wa lada em iyi iyi i bakla wa uni u bru heiwa da jubab ko wym em iyi iyi wa jia.
Da khana ko leh wa da thmu u wow pyndooh burom wei wow dai sarom ka ynne ka sngi ha Mairang wei kam u pa kwah u wow yachem wei wow kylli heiwa kat dang lai ki yow yachem wa u Roberto heiwa uni u manpa da lai u rap hakhmat ka khon, da mih syndet u Roberto wei da ah u da ka tari na rdang ka Phyrnailin.
Yeini da yoo leh da kiwi ki bru kiwa da ksoh noh ya oo pyn ha ini i thaw.
Katkam wa khana kiwa ha-yung ha-sem kani ka kynthai, da ong wa i daw ye u man wa da paan yalait ko wa uni u bru uwa na chnong Shyiap Mawnai.
Ya uni u bru da wa wan wow chimkti da ki pulit ka Mairang.
Mar ya jia ini, ya kani ka kynthai da pynkit wut-wut cha Civil Hospital ha Mairang, tangwa da khlaad noh ko.
Discussion about this post