Dei por booh ka High Court yeiwa ye kiwa chongdai madan u dai ya ki mar ki

Ka mukotduma PIL wa da yaleh heiyatoh wa kiwa chongdai madan, da bichaar biang ka ynne da ka Meghalaya High Court da u Justice I.P. Mukerji, Chief Justice wa u Justice W. Diengdoh, Judge.

Neiliang u muktiar kiwa chongdai madan da ong u wa deiwa pynleh wow bood ya ka hukum ka High Court wa da pynmih ha ka 12-06-25, neiliang ki bor sorkar da kyrriah yabor ki ya kiwa chongdai nei thaw wa em ki ha Police Bazar khlem da bood ya ka aiñ wei kamjooh khlem da e thaw ya ki deiwi yow dai ya ki mar ki.

Tangwa neiliang u Advocate General wa kiwi ki muktiar ka sorkar da kyntait ki yeini deiwa ong wa dadep wow pynbiang thaw chongdai tangwa ym bien ki wow lai cha i thaw wa da pynkhreh neibynta yong ki wei waroh kitu kiwa em License da em i thaw wa biang ya ki.

Hadien wa ap yeiwa yasaaid da waroh ki liang, ka yung bichaar da thung ko da u Subhasis Chakrawarty uwa man kam u Senior Advocate kam u Special Officer deiwa su cha oo Rs. 75,000 da ka sorkar jylla. Wei i kaam u toh wow ya krehlang wa u General Secretary ka seiñ kiwa chongdai madan, ki bor sorkar deilang ki pulit yow pynkhreh yei pyrtuid ki 349 ngut kiwa da em License wow chongdai madan.

Related posts

Chah rah bor ki le ngut ki nong India ha ka seiñ kieñ suloi wa emyatoh wa ka Al-Qaeda

July 3, 2025

Lai ujor ka JSU cha ka DMHO yei wym em Doctor ha ka sngi Saturday

July 3, 2025

Lada em won kiwa chongdai madan ha Police Bazar da ki wym em License, da phah ya ki pulit wow khanglaad ki ya kini.

Ya kitu won kiwa da em License u chah kattu katni sngi wei dei por wow chongdai ki hei thaw wa em ki kattæ. I por wow dai ki toh nadooh 12:30 i sngi hadooh 2:00 waje i sngi wa nadooh 7:30 i miet hadooh 9:00 waje i miet wei ymtoh u leh ki palat yeini i por wa da booh yow lait u thut i lai i wan ki bru kamjooh ki kari. Wei lada em kiwa leh pyrchah, da e bor ya u Special Officer deilang ki bor sorkar wa ki pulit wow khang yei chongdai.

Neiliang u General Secretary leh da phah wow pyntikna u wa manda yoh yei thaw chongdai wa da pynkhreh da ka sorkar wow lai cha ini i thaw chisiendon khlem pynslem.

Ya kitu ki wym pu em u yoh License da phah wow lai yaleh License ki katkam ka aiñ wei manda yoh ya ka Report na ki bor sorkar wa toh u pait yeini, ka High Court daw bichaar ko yeini.

Ya kani ka PIL daw chong bichaar biang ha u Naisaphra.