U khynroo uwa 22 snem i rta uwa na Meghalaya uwa da wiar nadooh ynnin ha Assam State Zoo-cum-Botanical Garden kawa tip leh kam ka Guwahati Zoo da chem ya oo ynne i janmiet da ki pulit.
Uni u khynroo toh uwa tip kam u Built More Bohthmit uwa na South Garo Hills wei da chem ya oo najan i yung wai u wa em ha Narengi, Guwahati.
Katkam wa yoh riñ da ka CCTV, da psiah u cha kani ka Zoo heipor kamwa 2:56 i sngi ha ka 3 tarik deiwa sap tupri, ka Mask wa tymmoh yei khmat, uwa kieñ muna, uwa sap patlun tbian wa ki juti wei ym em yoh u riñ ka CCTV wa mih u na kani ka thaw.
Nyngkong da suba wa da wiar u hadien wa chem ya ka muna wa ki juti u hajan ka thaw wa booh ya ki Giraffe wei hapoh ka muna u da chem ya ki kot ki sla wa em i pyrtuid u wei lai puræ Coaching Class u ha ka SPM wa em ha Guwahati dang chi bnai.
I thooh ya uni u khynroo da sdang ko nadooh ynnin i miet hadooh ynne tangwa da em ki bru wa yoo ya oo wa uiñ u dei kjat khlem sap juti wei da mih u na kani ka Zoo deiwa kynthiar najrong kynroh hajan ka Krishnanagar wei da yoo ya oo ha ka thaaiñ Hatigarh Chariali.
Kamtæ hei janmiet ynne, ki pulit ka Geetanagar Police da chem ki ya uni u khynroo heipor wa liwan u chei yung wai u hajan ka Down Town University wei katkam wa pyntip ki pulit da uiñ u samen samen waroh chi miet wa heipor sngi.
Ki pulit da rah ki oo cha thanat yow kylli takit ya oo wei da lai booh oo leh cha ka thaw sumaar yow pait u sylli yei long i man u.
Ka takit dang lai ko chakhmat yow chem tre yeiwa jia ini waroh wei kammon wa suk u wow mih napoh ka Zoo deiwa ku yei kynroh.
Discussion about this post