I yasiat da joor bha i ynne ka sngi hapyrdi ki chipai wa ki dkhot ka seiñ kieñ suloi NSCN da jia i ha iwi i khloo wa rben hajan ka chnong Khogla wa haap hapoh ka Wakka Circle ka Longding District ka jylla Arunachal Pradesh heiwa da yap uwi u dkhot katai ka seiñ.
Neiliang u Dekio Gumja, u Superintendent of Police ka Longding District da ong u wa da chim yei metyap uni u dkhot ka NSCN wei heipor wa kynreh ya ini i thaw da chem 15 kg i Improvised Explosive Device (IED), 34 tylli ki Detonator, ar tylli ki .22 Pistol, ar tylli ki Magazine wa kiwi ki tiar.
Ini i thaw wa jia ini haap i hapoh ka Tissa Police Station ha khappood India-Myanmar.
Ka khubor wa tikna da ong ko wa ini i yasiat da jia i heipor wa kynreh ki chipai ya ini i thaw hadien wa tip wa em ki 7-8 ngut ki dkhot ka NSCN ha ini i thaw.
Mar sñiaw kini ki dkhot wa em ki chipai ha ini i thaw da sdang ki wow siat cha ki chipai heiwa da mih i yasiat wa joor wei da yut noh kini ki dkhot ka NSCN hadien wa yap uwi na u lok ki.
Discussion about this post