Ka Behdieñkhlam ka Raij Jowai toh ka wow sdang nadooh ka 11 tarik uni u bnai heiwa i pynkhreh ka Seiñraij Jowai ya ka da man iwa lai chakhmat ha ki rukom waphær waphær nadooh i pynriam pynbait, i pynkhooid pynjngiar wa kiwi kiwi.
Ynne ka sngi, u President ka Seiñraij Jowai, u H. Toi da ong u wa i wan ka Behdieñkhlam ym mut i du wow beh ya ka kjut ka chitom tang wow yoh leh i kyrkhu na u Trekirot wa ki Sangia Saret ki wow wan hiar chirup wa oo ha kini ki Soo Sngi Le Yaaw wow yoh i bha i miat ha waroh ki thyndai yung hapoh ka Raij.
Da pyntip u wa ha uni u snem daw emlang ki ar ngut ki Deputy Chief Minister ka jylla wa kynthup ya u Sniawbhalang Dhar wa u Prestone Tynsong, chirup wa kiwi ki Montri sorkar wa ki MLA.
Neiliang u Dolloi ka Elaka Jowai, u Puramon Kynjing da khutlang u yei yakrehlang yong waroh wei da pyntip u wa da yaleh wow pynsuk yei lai i wan ki paidbah ha kini ki sngi wow wan deiwa thooh laad wow pyntbian yei por lehniam yow suk i lai i wan.
Da kyntu u leh ya kiwa wan sakhi ya kani ka lehniam wym toh u emi sñiawyapher hei ngait niam neibhah i pyndep ya ka Behdieñkhlam toh neibynta waroh deiwa kitbok leh ya waroh ki khon ka Raij ka ri wa ka jaitbru.
Chooh chooh da kyntu u wow pynneh yei khooid i jngiar ha ki talawiar ki soodong sookun yong i khnang wow ye u yada ya ka ramaw wei wow wanrah yei khooid ha i rukom im kam ki bru.
U Vice President ka Seiñraij Jowai, u EMH Passah da ong u wa ka Behdieñkhlam toh i por wow wan u Trekirot wow kyrkhu ya i ki bru, kamtæ da kyrpaad u ya kiwa wan wow em i mynsien wa khooid khnang wow yoh yei jooh i kyrkhu kamwa yohlang waroh.
Da e khublei Behdieñkhlam wasuk wa kmen u leh ya waroh.
Discussion about this post