Jowai : U R. Rapthap ynne ka sngi da wan chimkti u kam u DC ka West Jaiñtia Hills District heiwa u Arunkumar Kembhavi da e kti u ha oo ya waroh ki kaam wa dang sah yong oo wa kynthup leh ya ka Public Redressall System wa da pynkrehkaam u hapoh ka district kawa kynthup leh ya ka WhatsApp number kamjooh leh ki Facebook Account.
Ka khubor wa khadooh wa u Arunkumar Kembhavi wa e u cha kiwa chong chnong ka West Jaiñtia Hills da ong u wa emkaam ya ki khynroo khyllood wow yieñ ki ha ki kjat yong ki hi nadooh ki kaam chna TV chna Fridge wa kiwi kiwi neibhah boon ki por haap phet cha Shillong yow pyndep ya kini ki kaam wa khian.
Da pynchlur u leh ya kiwa heh spah yow pynemkaam ya ka poisa yong ki deiwa kyrchaan ki ya kiwa kwah u sdang khih sdang khan khamtam ha ki kaam uiñke sawari neibhah hapoh ka district dang emkaam i ya kiwa boon ki thaw baam wa biang, ki thaw ah sñiooh wa biang, ki thaw wan pynlut por kiwa boon wow pynwyrngia katkam ka juk wa katni.
Waroh ini toh da kdaw kti u ya ki khynroo khyllood wa ym hoi u yang ki ya i kreh sorkar wei ha kti yong ki chong ka mynried yong ka district.
Da e nongmuna u leh ya ka chnong Mawlynnong heiwa aw jan kawi pa kawi ka yung da ye ki u im ja ki na ki kaam uiñ sawari wei da pynchlur u leh ya kiwa emlang ha kani ka jooh ka kaam hapoh ka district wow boodien ki yeiwa da yah luti ki.
Da pynkut u deiwa ong wa kam uwa kreh sorkar oo ym em pyrchah u yei hukum ka sorkar wei daw pteiñ u yei jooh wada leh u kam u DC ka West Jaiñtia Hills, wei da kyntu u leh ya ki paidbah wow kyrchaan ki ya u DC wa thymme.
Discussion about this post