Ka seiñ Youth Helping Hands Organisation kawa da sdang ha ka 03-04-23 hajrong ka yurim u yarap kylliang kyrchaan kylliang para bru ha kiwa boon ki bynta khamtam heiyatoh i e snaam sñiawbha cha kiwa emkaam snaam hei kjut chitom, ha kani ka 15 tarik da lai e snaam sñiawbha ko ha Jowai Civil Hospital Blood Bank Centre.
Ha ini i lai e snaam sñiawbha da em soo ngut ki dkhot kani ka seiñ da yoh ki wow e laitlooid yei snaam neibynta u yarap ya kiwon kiwon ki bru wa em ha kyndian i im deiwa emkaam u yoh smat yei snaam.
Neiliang kiwa yahkhmat ka seiñ wa kynthup u Kitboklang Shadap, President, u Phrangsngi Sutnga, Vice President, ka Idaiamon Lyngdoh, General Secretary, u Phermeki Salahe, Asst. General Secretary, u Dawanki Bthuh, Treasurer wa ki dkhot hawa klam ha kani ka sngi da kyrpaad ki ya ki khynroo khyllood, ki manbei manpa wow emlang ki i mynsien kitkhlieh neibynta ka imlang sahlang dei wow yarap kyrchaan kylliang para bru ha iwon iwon i por, ymtoh u hun wow biang du kat ya samen.
Ong ki emkaam leh u yarap ya ki bru wa wan na ka manyung wa duna wa tymbuiñ khamtam hei kjut chitom ki.
Heiyatoh wa i yarap deiwa e snaam ong ki, “Iwa chi joo na phi katwon kordor i ya kiwi ki mynsien wa emkaam sakhiat heipor wa dawa kyndian por.”
Kani ka seiñ chim ko leh ka kabu u e khublei ya ki lok ki jor wa da yarap ha kiwa boon ki kaam ka seiñ iwa da leh ko ha ki snem wa da lai.
Discussion about this post