Ki pulit ka Anti-Narcotics Task Force Meghalaya deilang wa ki pulit ka East Jaiñtia Hills District, da pynman ki yei kynreh kari ha thaaiñ Umkiang hadien wa tip tikna wa daw wan kiwa khayi drugs.
Kamtæ hei step ka 17 tarik uni u bani, da yoh wow kem ya le ngut ki kynthai kiwa da bna naam hei khayi drugs wei na kini da yoh wow kem 80 tylli ki khieh sabon wa em 961.33 grams i Heroin iwa chongdor kamwa Rs. 4 klur.
Kini ki bru da suba toh kiwa krehlang wa kiwi de wei toh kiwa wanrah drugs na Manipur cha Shillong wa cha kiwi de ki bynta ka ri India.
Ini da sdang i hei miet ka 16 tarik heiwa da pyntip cha ki pulit heipor kamwa 11:00 waje wa daw em le ngut ki kynthai kiwa wan na Churachanpur, Manipur yow lai cha Shillong da ka kari kamai wei heipor kamwa 11:00 waje i step ka 17 tarik da ksoh ya kawi ka kari Maruti Suzuki S-Presso wei da kem ya ka Kimnei (33 snem), ka Dimkhothing (47 snem) wa ka Ngaiting (40 snem) kiwa waroh na Khonjoh, Tengnoupal, Manipur.
Kini ki le ngut da murieh ki ya kini ki khieh sabon wa em drugs hapoh soo tylli ki muna, wei neiliang ki pulit da kem wei da pynngat ki ki hapoh ka aiñ NDPS.
Ki pulit da pynchlur ki ya ki paidbah wa lada tip ki ya kiwi kiwa emkti ha kini ki jait kaam wow wan ki chakhmat wei daw murieh yei pyrtuid ki.
Discussion about this post