Ha iwi i jia wa pynkhyrngiat ya kiwa boon, ynne ka sngi ka Chief Minister ka Delhi, ka Rekha Gupta da chah thaab ko heipor wa pynman ya ka ‘Jan Sunvai’ namo ka Public Hearing ha i yung wa sah ko ha Civil Lines.
Uni u bru wa leh yeini uwa 41 snem i rta da tip kam u Rajesh Bhai Khimji Bhai Sakaria uwa na Rajkot, wei da lai u cha kani ka yalang chirup wa ki kot ki sla.
Da kbai khlemakor u leh u ya ka Rekha wei da thaab u ka chwa wow chah kem u wei da pakhot tiar u leh ya ka Chief Minister.
Ka Rekha da pat ko ha madam wei ki heh pulit leh da poi ki ha yung yong ka.
U Rajesh da wan u cha Delhi na Rajkot yow paan yarap na ka CM yow pynlait ya uwa em yatoh u uwa da chah kset tangwa kani ka kaam toh kawa dang em hei bichaar.
Ki pulit ka Rajkot da kylli takit ki ya ka bei u Rajesh kawa da ong wym tip ko wa lai Delhi u khon ko tangwa ye u man wa da lai u hadien wa mih ka hukum ka Supreme Court heiyatoh wa ki ksaw sarok wei u khon ko leh toh uwa em i duna hei bor pyrkhat wei jooh lai hi u cha Delhi samen nachwa leh.
Da ong ko wa i rukom man u toh wow dat bru khlem daw wei man u leh uwa kjut wa chitom hei bor pyrkhat wei ym bien u wow dih dawai. Man u leh u bru wa maya ya ki mrad wei hadien wa tip u ya ka khubor chaphang ki ksaw da man u uwa da wit bha i rukom pyrkhat wei da jooh dat u leh ya kiwa ha-yung ha-sem u.
Katkam wa pyntip da kiwa yoo yeiwa jia, u Rajesh nyngkong da e u ya ki kot ki sla ha ka CM tangwa syndet syndet da tba kti u ka ka CM wei da ksoh noh oo wei da rah ki pulit oo. Ya ka Rekha da pynkit noh wut-wut cha thaw sumaar.
Neiliang u BJP President ka Delhi, u Virendra Sachdeva da beiñ u yeini iwa jia wei ki pulit dang pynman ki yei takit hajrong ini. Ka BJP da ong ko leh wa iwa jia toh ym dei chah thaab donhi heiwa ka CM da chah khyrrup ko ha uni u bru.
Discussion about this post