U President ka Russia, u Vladimir Putin daw wan u cha India ha u bnai December uni u snem hapyrdi i chah pynngat dan (Tariff) ka India ha ka US heiwa u Donald Trump da maham u wow pynngat sa ki Sanction neidaw wa thied phniang ka India na Russia.
Chwa ini, u Putin deilang wa u PM ka India, u Narendra Modi daw yachem ki ha 1 tarik u Naikhynde ha Tianjin, China kam chibynta ka Shanghai Cooperation Organisation (SCO) Summit.
Ini i wan u Putin cha India toh i sien nyngkong nadooh wa sdang ka thma Russia-Ukraine ha u snem 2022.
Ini i wan i Putin da man i leh hadien wa i yatohlok ka India wa ka US da chah ktah bha i heiwa da chah pynngat dan 50% ki mar wa wan na India cha US heiwa da pynbaad leh ya ka India wa deiwa thied phniang ko na Russia da pyndap poisa ko ya Russia wow pteiñ ya kani ka thma.
Ka India da ong ko wa ini i chah pynbaad toh i wym em man hok neibhah kiwi ki ri wot ha Europe leh dang pteiñ hi ki wow khayi pateiñ wa ka Russia hadooh wow chim i phniang ya ka.
Ha waroh ini wa leh ka US, ka India da sdang biang ko wow yatohlok wa ka China heiwa da rai leh wow hær biang ki lieñsuiñ na China cha India kam nachwa chwa u sdang ka khlam COVID.
Ka Russia won da ong ko wa lada ki mar ka India ym ye ki wow lai cha US ka smat ko wow pdiang ki.
Discussion about this post