Ha ka Shillong Cherry Blossom Festival 2025 kawa daw pynman ha ka 14 wa 15 tarik u Khonchonglad (Nov) 2025, ha uni u snem daw pynman ha ka madan Polo (2nd & 3rd Field) ymtoh de ha madan Kurkalang, Ri-Bhoi kamwa jooh leh nachwa neidaw wa da sdang u chna ya ka madan Cricket ha katai ka thaw.
Yow lait u sahkut kari, neiliang ka sorkar daw pynman ko ya u sarok wow lai cha Polo kam u luti kjat donhi deiwa khang i lai ki kari.
Ha tymbud luti daw booh ki dukan wa boon jait kamjooh ki pynyoo rong heiwa da antaad wa daw wan hadooh 30,000 ngut ki bru heiwa dadep wow dai palat 9,000 tylli ki Ticket cha ki bru kiwa na baar ka Meghalaya.
Kawa syad dooh ka Ticket ha uni u snem dapoi ko hadooh Rs. 18,000 neibynta ka VIP+ katwa kiwa toh dor dooh man ki Rs. 2500-3000 ha ki thaw chong paidbah neibynta ka 14 tarik katwa ka ya ka 15 tarik won ym pu em pynbna.
Waroh kiwa thied Ticket daw yoh ki leh ya ki Synchronised LED Wristbands kiwa daw che heijooh i por katkam wa man i sur.
Ha uni u snem dadep wow pynbna yei pyrtuid kawa da kha ha Morocco kawa tip kam ka Nora Fatehi kawa man kam kawa chaad wa ka Actress Bollywood neitæ u Jason Derulo wa ki The Script.
Ka sorkar da pyntip ko ha u 2024 ki tamasa wa da pynman nadooh ka Cherry Blossom, ka Me.Gong Festival wa kiwi de da pynlut ko Rs 23.5 klur heiwa da ye wow pynmih poisa Rs. 133.42 klur iwa man 6 chah na iwa pynlut.
Discussion about this post