Ka CBI da rai ko wow lai cha ka Supreme Court pyrchah ya ka hukum ka High Court ka Meghalaya yow pynlait ya ka Ampareen Lyngdoh, Montri sorkar deilang wa ar ngut kiwa jooh man kam ki heh sorkar ha ka chnat Education heiyatoh wa ka mukotduma biah sia lieh.
Neiliang ka CBI dadep ko wow Charge Sheet ya kini ki le ngut wei ka bichaar toh kawa da lai chakhmat tangwa ka High Court ha ki bnai wa dadep da ong ko wa toh u pynduna noh ya kiwa sakhi heiwa ka CBI da pynkhreh ko 492 ngut kam kiwa sakhi tangwa dadep wow kylli takit du 28 ngut wei da phah pyndam 200 ngut wei wow kylli takit ya ki 292 ngut.
Ka CBI da ong ko wa ymtoh neidaw wa boon ware kiwa sakhi neibhah da Charge Sheet neidaw wa da biang ka sabut wei khlem ka sabut ym ye wow lai chakhmat.
Chooh chooh ka CBI da ong ko wa ka High Court ym em u pait ko tang ya ki kot ki sla (Records) kiwa da em chwa ha ka Trail Court, wei i takit yeini i kaam toh iwa da phah da ka High Court tangwa pyn da ka High Court hi wa pyndam ya ka FIR wa da e ka CBI.
Ha ka hukum ka High Court wa da pynmih ynnin da ong ko wa kini kiwa sakhi kiwa da pynhiar cha 181 ngut, da ye ka CBI wow takit ya 28 ngut donhi wei da lai ini i kaam la 17 snem nadooh wa sdang ya ka wei da e kti ha ka CBI ha ka 02-11-17 kiwa da Register ya ka Case ha ka 03-01-18 wei da chimpor ya ka CBI hadooh ar snem chiteiñ wow Chare Sheet ha ka 25-06-20.
Kamtæ da ong wa 17 snem da lai nadooh wa sdang wow leh yeini i kaam nadooh wa da e ya ka FIR wa nyngkong ha ka 18-07-2011 wei du 28 ngut kiwa sakhi kiwa dadep wow kylli takit wei manda pynslem kamni du wow leh ya ka Criminal Case da man ko pyrchah ya ka Fundamental Rights kiwa chah pynbaad hapoh ka Article 21, 19 wa 14 yow ye ki u im deiwa khlem chah pyndik i pyrkhat pyrdaiñ neidaw wa joor i pynslem wei lada yang hadooh wa pyndep u takti ya waroh kiwa sakhi daw chimpor hadooh wa yap kiwa chah pynbaad.
Hajrong ini da ong wa em kiwa da pynemkaam bakla yei bor ki, kamtæ ka yung bichaar u khanglaad ko yeini deiwa pyndam noh ya ka hukum wa da pynmih ha ka 23-08-22 da ka Special (CBI) Case No.2 da u Special Judge (CBI), East Khasi Hills District, Shillong wei waroh ki ujor pyrchahya ki le ngut ha kani ka mukotduma u pyndam noh ki.
Heiyatoh wa i pynkylla ya ki Marks kiwa yaleh kreh Assistant Teachers ha ki Lower Primary School ka sorkar ha u snem 2008-09, ka High Court da ong ko wym em biang ki sabut wow pyntikna wa em i leh bakla neibhah katkam wa da pynoo ha ka yung bichaar da em le tylli ki Mark Sheet kiwa em i jooh ki Marks wa da soi ki 5 ngut ki heh sorkar.
Najrong ini da em leh 246 ngut kiwa da chah pyndam hadien wa thung kreh ki neidaw wa man ki ki wym em khooid. Kini ki 246 ngut toh na ki 521 ngut kiwa chah thung.
Heiyatoh won wa i chah pynbaad ka Ampareen wa phah ko ki Slip cha ki heh sorkar yow pynkylla ya ki Marks da ong wa ini ym em mut wa man ki kam ki sabut wa da pynkylla ya ki Marks neitæ da ong leh wym leh wanrah ya ki kot ki sla wa pynyoo wa em i biah sia lieh.
Discussion about this post