Ka Pt. Deen Dayal Upadhyay Community College and Skill Development Centre Wahiajer ha ka 4 tarik da pynkut ko ya ka e sikai wa 7 sngi neibynta i kaam soor sula ya ki kynthai “Tailoring For Ladies” kawa pynman nadooh ka 28-08-25 hadooh ka 04-09-25 heiwa da em kamwa 35 ngut kiwa wan chah sikai na kylleiñ ka Ri-loom Jaiñtia.
Ha ka yalang pynkut ya kani ka e sikai wa pynlai da u Wolnish Rymbai, Program Coordinator DDUCC da emlang ka I. Wahlang kam ka kongsan, u Prof H. Lamin, Retd. Founder Principal ka DDUCC kam u symbood kongsan, u Dr. F.R. Sumer, Principal ka DDUCC, u Andrew Sari, Secretary chnong Wahiajer, ki bru chemphang, ki khynnah wa chah sikai wa kiwi.
Ka kongsan hawa e yei klam da pynchlur ko ya kiwa chimbynta wow yieñ ki hei kjat yong ki dahi wei u pynemkaam yei stat wa yoh ki na kani ka e Training najrong wow pynku yei kaam soor that ha Ri-loom Jaiñtia hi waroh kawi.
Da ong ko leh wow pynemkam hok ya ki tiar ICT kamjooh leh ka Internet khnang yow tip u sñiawthooh ki heiyatoh ki Scheme waphær waphær wa da kyrchaan da ka sorkar jylla wa ka sorkar pyrdi.
Kiwi ki waheh wa da klam da kyntu ki ya kiwa chimbynta kamjooh ya ka imlang sahlang wow booh kyrpang ki yei rukom khih wa da yoh ki na kani ka e sikai khnang wow ye ki kam ki bru wa ki dkhot yong ka imlang sahlang hei kaam khayi pateiñ wei wow pynemkaam hok yei tip i stat iwa da yoh ki, yow man leh kam ka laad kawa khroo yow kyntu kynrong yei yoh i kot yong ki.
Ini i thmu man i kam chibynta i e kti wa rap yillu yong ka DDUCC wa ka NEHU neibynta u pynku yei tip i stat, i roi i paar ha ki bynta waphær waphær, iwa man leh kam chibynta ka NEP 2020 wa katkam i thmu yong u (L) Pandit Deen Dayal Upadhyay.
Da pynkut ya kani ka yalang deiwa saam ya ki Certificate cha kiwa chimbynta wei da yoh yei kyntien e khublei na ka Wanda Lanong, Guest Faculty DDUCC.
Discussion about this post