U Deputy Chief Minister uwa pait leh ya ka District Council Affairs (DCA), u Prestone Tynsong da pynche u wa ka sorkar jylla ym em ko iwon iwon i thmu wow leh jhan hawa chim rai yow pait noh da ka ya ki tulop ki District Council.
Hawa e jubab hajrong ini hapoh ka yung dorbar chna aiñ, u Prestone da ong u wa ka sorkar da thung ko le tylli ki Committee yow pait yei krehkaam ki District Council wa kamjooh i rukom pynlai ya ki kaam poisa poilaiñ yow pyntikna wa man ko kawa khooid.
Kini ki Committee da thung yow pait wa ki District Council u bood ki ya ki kyndon sorkar wei rukom pynlai poisa wei kini ki Committee deiwa yasyllok wa ki Council heiwa ki sahep wa man kam ki IAS wa MCS u lai ap ki yeiwa sñiaw ki Council chwa wow phah ki yeiwa chem ki cha ka sorkar.
U Prestone da ong u wa ka sorkar da leh ko deiwa pyrkhat wei ap yei sñiaw yong waroh ymtoh kam kiwi ki sorkar kiwa chim rai khlem da lai ap chwa yei sñiaw yong waroh wei kini ki Committee da booh por wow e ki ya ka Report hapoh 45 sngi hadien wa da pait da yoo yei rukom krehkaam ki District Council.
Da khana u leh wa katkam wa man kattæ ka JHADC ye ko wow pynmih ₹68.98 klur chi snem naki mar pohkhyndaw wa na ka chnat Transport tangwa emkaam ₹102 klur du ka bai tulop.
Ha GHADC da ye ko wow pynmih ₹14.5 klur chi snem tangwa du neibynta ka tulop da emkaam ki ₹84 klur.
Ha KHADC ye ko wow pynmih ₹46.11 klur katwa ka tulop won emkaam ₹72 klur chi snem.
Kamtæ da ong u wa ka sorkar kwah ko wow pynkhlan ya ki Council wei wow pynmiat pynbha yei pynlai ki ya ka poisa ha waroh ki District Council.
Heiyatoh won wa ka 125th Amendment ka Constitution, da ong u wa ka sorkar jylla da booddien bha ko yeini wa ka sorkar India.
Discussion about this post