Uwi u bru wa 29 snem uwa na Mahabubnagar District ka Telengana da chah siat yap u ha ki pulit ka USA hadien wa yachoh u wa u para wa sah lang u ha katai ka ri.
U Mohammed Nizamuddin toh u Software Engineer wei da lai u cha California yow pyndep ya ka Masters Degree, wei da chah siat yap u ha ki Santa Clara Police ha ka 3 tarik uni u bnai.
Neiliang u pa u Mohammed, u Hasnuddin da ong u wa da mih i yachoh hapyrdi wa u lok wa sahlang u wei dang ynnin ka 18 tarik tip ki yeiwa da chah siat yap u.
Ha ka chithi cha u External Affairs Minister S Jaishankar, u Hasnuddin da paan yarap u wow wanrah biang yei metyap cha Mahabubnagar.
U Amjed Ullah Khan uwa e ktien ka Majlis Bachao Tahreek (MBT) da khana u yei kyrpaad ka yung deiwa kyntu ya ka sorkar wow chimkhia yeini.
Neiliang ki pulit da ong ki wa heipor 6:18 i step ka 3 tarik da em i siat yap ya uwi u bru wa ksoh tari wei da kit noh ya oo cha thaw sumaar heiwa da yap u ha luti.
U Police Chief, u Cory Morgan da ong u wa da mih i yachoh hapyrdi ki ar ngut wa sahlang chwa wow poi ki pulit wei manda poi ki pulit ha ini i yung da chem ya u Nizamuddin wa chong u hajrong uwi u bru wei da ksoh u ya ka tari ha kti wei heini i por da ong ki pulit wow sangeh tangwa da mut u wow dung ya uni u bru kamtæ da siat ya oo soo kuli.
Da ong u leh wa katkam i takit da chem wa i leh u pilut wow siat ya u Nizamuddin toh iwa biang neibhah wa da ye u pynlait im ya uwi wei da chem leh ya ar tylli ki tari na ini i thaw.
Discussion about this post