Ha ka yalang pynkup burom ya ki khynroo khyllood kiwa da lehbha ha ka Result SSLC wa HSSLC yong u snem 2025 da i naam “U Kiang Nangbah Best Students Award” kawa da pynman da ka Akhil Bharatiya Vidyarthi Parishad (ABVP) Jowai Unit, ha ka 19 tairk ha District Library Auditorium Jowai, da em palat 90 ngut tam ki chynrang wa kynthai ka Ri-loom Jaiñtia kiwa yoh pdiang ya kani ka Award.
Ha kani ka sngi pynkup burom, da emlang u Shanbor Shullai, Montri sorkar kam u kongsan, u Prof. Sumarbin Umdor, Pro Vice- Chancellor, North Eastern Hill University kam u symbood kongsan hei emlang u O. Rilando Challam, Retired Associate Professor Kiang Nangbah Govt. College, u Bomsing Khongtir, National Executive Council Member ka ABVP wa kiwi najrong kiwa sikai wa ki khynnah skur wa boon.
Kani ka U Kiang Nangbah Best Students Award ymtoh wa pait ko du yei kreh chitom ki khynnah skur tangwa wot wow e mynsiem leh ya ki u em ki i kitkhlieh kam ki khynnah neibynta u kreh ya ka imlang sahlang wa ka ri hi waroh kawi.
Kiwa klam ha kani ka sngi wa kynthup ya u O.R. Challam, u Prof. Sumarbin Umdor da kynmoo tamdeiñ ki yei lai luti u Kiang Nangbah kam u khlawait hei wow yakhun pyrchah nei wan thombor ka sorkar pharæng.
U Shanbor Shullai hawa yieñ klam, da khana u wa oo da yaleh u wow pynkrehkaam yei rai wow pynduna yei ktien deiwa pynboon dei kaam, neibhah manda joor ware i ktien, i kaam won ym lær iyi iyi.
Hawa e mynsien ya ki khynroo khyllood khana u yei lai luti yong oo kam u bru wa wan na ka manyung wa dooh nadooh i por khynnah wa dang man kam u khynnah skur. Ong u wa oo da lai luti u boon i eh i khoo, tangwa dei kreh chitom katni da suk da kmen u. Wei heipor wa dang maad bha u yei dooh i saja ong u boon kiwa yoobeiñ, tangwa hanla kattæ leh oo man u uwa satar.
Da e nongmuna haroh u ya ki kattu katni ngut ki bru khroo ka ri kam u Dr. Rajendra Prasad, u Abdul Kalam, u Prime Minister wa katni u Narendra Modi, u Montri Rangbah warim ka jylla, u (L) Dr. D.D. Lapang wa kiwi heiwa kini leh chwa wow poi ki cha ka kyrdan wa khroo dadep maad wei lai luti chwa ki boon i eh hei im ki.
Discussion about this post