I pyndik ki bru na ka jaitbru Karbi ya ki warep Pnar na ka chnong Lapangap da pteiñ i heiwa da chah siat watur ki Pnar katwa dang ah ki ya u kba loom wei da hap sangeh noh ki wow ah ya u kba nadooh chiteiñ sngi ynne.
Hawa yoh u yaklam wa Waheh Chnong ka Lapangap, u Deibormi Lyngdoh ynne i miet, da pyntikna u yeiwa jia ynne ka sngi heiwa da man iwa sñiawsih wa chah pynthut biang ki Pnar na ka chnong heipor wa ah ki ya u kba wa da ih.
Da ong u wa ynne u kba wa ah toh u kba loom uwa da ih wei ha ki tayaaw wow wan daw hap ah ya u kba hali, deiwa pynrap wa i buit ki Karbi hi toh wow pynthut ya ki tre chnong u ah ya u kba yong ki.
Chooh chooh da ong u wa mynstep ka 20 tarik ym em de wow ah ya u kba tangwa ha ki tayaaw wow wan daw hap ah ki ya u kba wa em ha hali.
U Deibormi da ong u leh wa ha ka tayaaw wow wan daw yachem wa u Deputy Commissioner wa u Superintendent of Police ka West Jaiñtia wow pynbiang ya ki pulit kamjooh leh wow e bor ya ki wow synraan ya ki warep heipor wa ah kba ha ki thaw rep neibhah ha ki sngi wa dadep da neh ki hajan chnong donhi.
Da ong u leh wa i rukom pynlang ya u kba ymtoh de man i kam ha ki por wa ki snem wa dadep.
Heijooh i por da ong u wa ka chnong kyrpaad biang ko ya ka sorkar wow pynbiang ya ki bor pulit wei wow e bor ya ki khnang wow lait nei mynsoo wa kiwi ki jia wa sñiawsih.
Ki warep leh da ong ki wa lada ka sorkar ym ye ko wow yada ya ki, man iwa sepai ya ka wow man ka Meghalaya kawa laitlooid.
Discussion about this post