Ha ka 59th Foundation Day ka KNGC pynbna u Sniawbhalang ya ka Rs. 25 klur yow chna pynmiat ya ka College

Ynne ka sngi ka Kiang Nangbah Government College, Jowai da lehkmen ko ya ka 59th Foundation Day heiwa ya kani ka College da sdang ha ka 15 tarik u Naikhynde u snem 1967 wei da wan wow embynta ynne da u Deputy Chief Minister ka jylla, u Sniawbhalang Dhar kam u kongsan hei emlang ki sahep sorkar, ki khynnah wa katni wa ki warim ka College.

Ha kani ka sngi da pynman yei lehkmen ha Auditorium ka College heiwa da yoh ya ki kyntien pdiang burom na ka Principal, ka Dr. LM Darnei kawa da khana wa ha ka College em 3126 ngut ki khynnah ha ki 15 tylli ki Department waphær waphær wei da e khublei ko ya u Sniawbhalang wa da pynmiat u ya ka College.

Da ong ko leh wa dang em chiboon i duna ha ka College nadooh ki Classroom, kiwa sikai, ki Laboratory wa kiwi kiwi deiwa kdaw wa duna bha i yoh tulop ki kattu katni kiwa sikai ha ka.

Ha kani ka sngi da pynkupburom leh ya ki khynnah ka College wa yoh kyrdan Top 10 ha ki Exam NEHU yong u snem 2025, ki khynnah warim wa yoh PhD wa kiwa kreh wa da chakri palat 25 snem.

U Sniawbhalang hawa e i klam kam u kongsan da ong u wa sñiawkmen u wow yoo ya kiwa da rah naam ya ka College ha ka Exam 2025 ka NEHU.

Da ong u wa i lehkmen ym chong i ha kiwa em katni tangwa ha kiwa sikai wa ki khynnah warim wa da poi hadooh uni u pood.

Chooh chooh da ong u wa emkaam leh u man kiwa minot ha yung neibhah kiwa sikai da e ki yei stat ha ki khynnah.

Da pyntip u wa da pynkhreh ya ka DPR neibynta wow chna pynmiat ya ka College heiwa da booh bhah kamwa Rs. 25 klur heiwa ha ka National Games wow wan daw ye chooh u pynmiat ya ki College.

Heijooh i por da ong u wa daw e u ya 50 tylli ki Laptop cha kiwa sikai ka College ya kiwa daw e kti hawa kut u Naichiphaw wei ka sorkar katni pynlut poisa bha ko wow e sikai ya ki khynroo yow ye ki u yoh kreh neibhah i yoh khih toh iwa joor bha i yaleh deiwa pynrap wa ymtoh u yang bait yei khih sorkar.

Da ong u wa ymtoh u bichaar ya i hi wa kiwi neibhah wa man i iwa bakla bha tangwa emkaam u em i chaniah pyn ha i hi wei ym myntoi won leh u kreh chitom lada ym em ki ya ka thong.

U Sniawbhalang da ong u wa kam kiwa mihkhmat paidbah wa em ki por emkaam wow khana hok wei em won ki por wow thok neibhah i thok ki toh neibynta iwa bha iwa em cha lyndet.

Da ong u leh wa manda lai cha Shillong, East Jaiñtia wa kiwi ki thaw manda yoo u wa yah kari ki khynroo da ki kari heh kam ki Fortuner wa kiwi kiwi pynkmen ya oo neibhah wa da ku ki khynroo neini.

Ya ki kyntien khublei da yoh na u PB Lyngdoh uwa man u HoD Incharge, ITEP.

Da pynphooh ya ka lehkmen da ki rwai wa ki chaad na ki khynnah wa kiwa sikai kani ka College wei da saam leh ya ki Prize cha kiwa jop ha ki yakob waphær waphær.