Ka Supreme Court da sñiawkhia bha ko yei chah pynemkaam bakla ka kyndon Section 498A ka aiñ Indian Penal Code (IPC) hawa chong bichaar ynnin ka sngi ya ka mukotduma ki chi kurim kiwa dang dep bia chi bnai chiteiñ donhi deiwa ong wa ka bei u chynrang katni da tieñ bha ki yei chah pynbaad bakla ki deiwa pynemkaam ya kani ka kyndon aiñ.
Hawa bichaar ya ka mukotduma, ka Justice Nagarathna da ong u wa ha kini ki sngi ka bei-kurim (ka bei u chynrang) tieñsar bha ki ya ka kurim neidaw wa chah pynbaad thok donhi heiwa ka SC da jooh pyndam ko ya kam kini ki mukotduma. Da ong ko wa waroh ymtoh ki ujor thok, tangwa ka 498A man ko kawa khor bha wei da chah pynemkaam bakla bha ko hadooh wa man i lakam wa ksih sohjaaw hapyrdi ki chi kurim.
Heiyatoh wa kani ka mukotduma, ka Bench ka SC wa kynthup ya ka Justice BV Nagarathna wa Justice R Mahadevan da phah ki ya ka kurim, u kurim wa ka bei-kurim wow embynta hei klam yapynbait (Mediation) heiyatoh wa ka ujor wa da e hapoh kani ka kyndon ka IPC.
Ka Bench da ong ko leh wa hanla ya kani ka kyndon da pynmih wow yada ya ki kynthai heiyatoh wa i chah lehbeiñ wa i chah dawa poisa (Dowry) tangwa da man iwa khia bha ya ki yung bichaar.
Ka Supreme Court da jooh kdaw ko yei chah pynemkaam bakla ya ka Section 498A ha ki snem wa dadep heiwa ha u Naisan 2024, u Justice JB Pardiwala wa u Justice Manoj Misra da kyntu ki ya ka Parliament wow pyrkhat bha ya ka Section 85 wa 86 yong ka Bharatiya Nyaya Sanhita, 2023, neibhah wa pynneh ki ya ki kyntien ka Section 498A ka IPC.
Ha u Naitung uni u snem, u Justice Surya Kant wa u Justice N Kotiswar da pynksan ki ya ka Section 498A, deiwa ong wa i chah pynemkaam bakla ym mut i wow pyndam ya ka kyndon aiñ neibhah wa yada ko yei hok ki spah ngut ki ujor wa sakhiat na ki kynthai wa chah lehbeiñ ha ka yung ka sem.
Ka Bench wa yahkhmat da ka Justice Nagarathna da pyndam ko wow leh da ka Criminal Proceeding manda mih i ya kajia ki chi kurim, deiwa ong wa emkaam wow bichaar bniah ya ki mukotduma wa yatoh wa i kajia hapyrdi ki chi kurim deiwa kyntu leh ya kiwa ujor wym toh u chim kabu ki yow pynhiar tput ya u kurim wa kiwa ha-yung u.
Ha u Kmaichonglad 2024 ka Justice Nagarathna chirup wa u Justice N Kotiswar Singh da ong ki wym toh wow pynchitom ya waroh kawi ka yung u kurim manda mih i ya kajia hapyrdi ki chi kurim katwa kawi won ka Bench ha u jooh u bnai da ong ko wa ka Section 498A da chah pynemkaam bakla ko chirup wa ki kyndon slaitbor kamjooh wa kiwi ki kyndon kam ki ‘Combine Package’ wow pyntieñ ya u kurim.
Ha ki bichaar ha u 2025, ka SC da pyndam ko boon tylli ki FIR wa ki Chargesheet neidaw wym biang sabut wei ym em ki daw wa skem wow chong bichaar ya ki.
Discussion about this post