Ka 2 tarik u Naichiphaw toh ka Gandhi Jayanti kawa man kam ka sngikha yong u Mahatma Gandhi uwi na ki bru wa khroo wa kynsai yong ka ri India.
Kamtæ kamwa man ha kylleiñ ki thaw yong ka ri India nadooh ki thaw purae, ki yung krehkaam sorkar kamjooh ki chnong ki thaw chimkhia ki wow lehburom ya kani ka sngi ha ki dur ki rukom waphær. Ha Loomkyrwiang Dorbar Chnong, Jowai leh ha ka thong yong kani ka sngi da pynman ko da ka Awareness Cum Cleaning Drive Programme.
Ha ka yalang wa tbian hei pynlai ka Heiyoomitre Pakma, Secretary Social Committee, neiliang u Waheh Chnong, u Lammat-OO Laloo hajrong ka thong yong ka Swachh Bharat Mission da klam khana u chaphang i thrang i angnood yong u Mahatma Gandhi. Ong u leh ka Dorbar Chnong ha kini ki kajiak snem i lai luti da pyrchang yaleh ko u pynman ya ka dong ka chnong kawa sap wa kup yei dur wa khooid wa pliah, ong u leh sñiawsarong u ong wa ha uni u snem lyngba ka Jowai Municipal Board dadep pynbna ko wa ka Loomkyrwiang man ko kawi na ki dong ki chnong wa khooid hapoh ka sor Jowai deiwa yoh leh yei kyrdan wa le.
Yooluti u lyngba kani ka sngi wa ki paidbah wa chong wa sah hapoh u pood u ang ka dorbar chnong u kitkhia ki wow yait nei noh jhep noh taroi kat chawa yoh wei wow yakrehlang wa ka dorbar chnong hajrong ini i thmu khnang wa ini i burom wa da yoh u pynjanai chooh i ki kat nang lai ki por ki sngi.
Chooh chooh iwa kyrpang leh ha kani ka sngi ha ka thong yong ka Swachh Bharat Mission da yoh leh i purae ya ka Swachh Bharat Pledge hei chimbyntalang da waroh neitæ pynbood leh i pynkhooid pynjngiar ya ki luti, ki syngkieñ, ki umbaam umdih, umsait umkhleiñ wei niaam chuni.
Discussion about this post