Ynne ka sngi 7 tarik u Ñaichiphaw kawa man ka sngi leh burom khaddooh ya ka met wa sah u Rev. Fr. Hilarius Lamare, Parish Priest ka Cathedral Parish Jowai uwa da khlaad nadooh ka 5 tarik, da sakhi yei wan tooid ki paidbah wa boon cha Parish Jowai wow chimbynta hei leh burom khaddooh ya oo.
Ha kani ka sngi da wan emlang ki Phadar na ki Parish waphær waphær ka Ri-loom Khasi wa Jaiñtia, kiwa mihkhmat paidbah nadooh ki MLA, MDC kiwa yahkhmat yong ki chnong, ki Elaka wa kiwi najrong ki paaid wa ngait ka Balang Catholic na ki Parish ki Balang chnong waphær waphær.
Yei leh burom khaddooh chwa wow lai tlep ya oo ha kani ka sngi, da sdang da ka Mass Wakhooid nadooh i por 10:00 waje i step hei yahkhmat u Bishop ka Jowai Diocese u Fr. Ferdinand Dkhar.
U Fr. Ferdinand Dkhar hawa klam da pynkynmoo u yei lai luti u Fr. Hilarius Lamare kam u chakri yong u Blai hadooh ka sngi wa khlaad noh u na kani ka pyrthai.
Ong u lyngba i emlang kiwa boon ha kani ka sngi kiwa da booh i duwai, yooluti u wa u Fr. Hilarius u man u uwa biang dor wow yoh yei nong ha ka hima u Blai neibhah da kreh chit rhem u wow chakri ya u Blai kam u Lyngdoh ha ki 42 tylli ki snem wa da lai.
Khana u wa man u leh u bru wa kreh chitom hei wow tei yei rukom im bru wa bha, kamjooh leh i im wa kynja mynsien.
Hadien wa dep leh burom ha Cathedral Jowai da ya mih ki paidbah wa boon wow lai tlep ya oo ha loom tlep-bru ka Balang Catholic Jowai.
Discussion about this post