Ka Jaiñtia National Council (JNC) Central Executive Committee da e kti ko da ka dorkhat ha u MP ka Shillong Constituency u Dr. Ricky AJ Syngkon heiyatoh wa u sarok NH-6 ha Jaiñtia Hills.
U General Secretary ka JNC-CEC, u Wanshwa Suting hawa e u yei klam da ong u wa ka seiñ da pynsñiaw ko yei sñiawkhia wa khroo hajrong i pynslem wei wym yo biang i rukom chna ya u National Highway-6 nadooh Jowai Bypass hadooh Ratacherra, deiwa kyntu joor ko ya u MP wow chimkhia u.
Ka seiñ da ong ko wot hapyrdi i phah yong ka Meghalaya High Court wow pyndep chna ya u sarok ha u bnai August 2025, tangwa hadooh katni wym pu dep, iwa da wanrah yei sahkut kari man-ka-sngi iwa da pynslem yei lai i wan ki paidbah, khamtam ya kiwa lai skur, kiwa lai kreh wa kiwi de.
Ka seiñ da khyrwait ko leh ya ki Contractor khamtam ya ka Purvanchal Buildtech Pvt Ltd kawa himkti wow chna nadooh Jowai Bypass hadooh Ratacherra, wym chimkhia ko wow pynbiang wei pyntoh yei rukom kreh ya uni u sarokbah, wei da kyntu leh wow booh Blacklist ya ka lada ym bien ko u kreh kamwa toh u kreh ko.
Da ong leh wa i eh wa katni toh hadien i chna ya u surokbah da khian u neiwa jooh em u wei i pynemkaam ya ka Cement wow chna ya u sarok ym yahaap neibhah ka thaw toh kawa joor slap wei daw smat sih u najrong wym biang ki dooid um daw booh ko hei maa wei daw smat sih u sarok.
“U NH-6 toh u luti im yong ka thaaiñ yong i ki paidbah ka Jaiñtia Hills wei toh i yoh hok ki wow yoh u sarok wa chngaaiñ wa neh slem wa da chna bha ymtoh kamwa yoo katni kawa da yoo wym em chimkhia kiwa kreh,” da ong u General Secretary JNC-CEC.
Ka seiñ da kyrpaad joor ko ya u MP wow pynbor ya ka sorkar pyrdi wow chimkhia ko yeini wei wow bichaar bniah ko kamjooh wow pyntikna ko leh wa dep smat wow pynchna ya uni u sarokbah neibynta i bha i miat yong ki paidbah.
Hawa yaklam wa u MP, da kular u wow chimkhia yeini i bynta wei da kular u leh wow lai sakhi lai pait da oo hi ha ki sngi wow wan yow ye u leh yeiwa emkaam.
Discussion about this post