Chah e FIR u tre ka Ola Electric hadien wa pynkut uwi uwa kreh yei mynsien  

Uwi u Engineer wa tip kam u K. Aravind uwa kreh wa ka Ola Electric da pynut u yei mynsien wei da ieh u ya ka chithi wa 28 sla wa thoh u dei kti heiwa da pynbaad u ya ki heh wa kynthup ya u tre ka Ola, u Bhavish Aggarwal wa pyndik wei chim kabu ki heiyatoh wa ki kaam poisa.

Ka Ola hawa e yei jubab da ong ko wa uni u Engineer ym jooh em ong u iyi iyi næ booh u ya kawon kawon ka ujor heiyatoh wa ini wa da kam u wa jia ya oo.

U K. Aravind toh uwa kreh kam u Homologation Engineer nadooh u snem 2022 ha Ola, wei da pynkut u yei mynsien deiwa dih bih ha ka 28 tarik u Naikhynde uni u snem ha i yung wa sah u ha  Chikkalasandra, Bengaluru. Da chem ya oo da ki lok u deiwa yoo chitom ki oo wei da kit ya oo cha Maharaja Agrasena Hospital yow yoh sumaar tangwa da khlaad noh u pyn ha ka jooh ka sngi.

Ki pulit da booh ki da ka Case Unnatural Death Report (UDR).

Hadien wa yap u Aravind, u payu u da chem ya ka chithi wa em 28 sla heiwa da pynbaad ya u Subrat Kumar Das wa u Bhavish Aggarwal yei chah pyndik u ha ki ha thaw kreh wei da chah pyndooh u leh ya ka tulop wa kiwi de kiwa toh u yoh hadooh wa poi cha u pood wa pynkut u yei mynsien u.

U payu u Aravind da pyntip u wa em ka poisa wa Rs.17,46,313 wa poi cha ka Bank Account u diah u ar sngi hadien wa yap u wei manda lai paan u yei pynche na ka Ola, neiling u Kumar Das ym ye u wow e yei jubab wa che. Hadien ini da wan le ngut ki bru na ka Ola wa kynthup ya u Kratesh Desai, u Paramesh wa u Roshan tangwa kini leh ym ye ki wow khana deiwa che iwa da pynsuba ya kiwa ha-yung u Aravind wa em iyi ræ iyi i thmu ka Ola wow murieh.

Related posts

Lada ym ye u pynbait ya u pood Assam-Meghalaya ham khut yaklam yasuk ya ka HNLC

October 20, 2025

U chah u ah kba ki Lapangap khlem da chah pynthut deiwa e kti ki ya kiwa emkti wow pynyap ya u Karbi

October 20, 2025

Hadien wa lai ujor u payu u Aravind, ki pulit da pynngat Case ki ya u Bhavish Aggarwal, u Kumar Das wa kiwi de ha ka 6 tarik uni u bnai tangwa da mih pyrthai ini wa jia dang ynne ka sngi.

Ha ka FIR da ong wa i leh kini ki heh ka Ola dapoi i chadooh wa yap u Aravind heiwa da kyntu ya ki pulit wow leh ki yeiwa emkaam neibhah kini da embynta ki heini i yap u.

Ka Ola da ong ko wa da lai ko cha ka High Court ka Karnataka yow yaleh pyrchah ya kani ka FIR wei da yoh ya ka hukum wow e yada ya ka Ola Electric wa ki heh ko. Wei kam chibynta wow yarap ya kiwa ha-yung u Aravind da phah ki ya ka poisa cha ka Bank Account u. Heijooh i por da ong leh wa ka Ola Electric ya krehlang ko wa ki pulit hei takit yong ki.