Ka Indian Senior Women’s Football daw sdang ko ya ka Tri-Nation International Friendly Campaign pyrchah ya ka Islamic Republic of Iran ha ka 21 tarik uni u bnai ha Jawaharlal Nehru Stadium, Shillong. Kani ka yalehke u sdang ko heipor 6:00 waje i janmiet wei ye u pait ka dei mynkna ha https://www.plus.fifa.com/en/?gl=in.
U Head Coach ka India, u Crispin Chettri, da ong u wa kani ka Tournament man ko kam chibynta wow pykhreh ya ka AFC Women’s Asian Cup Australia 2026, wei yow chem leh ya kiwa yalehke wa em yei sap wei ka yalehke mynstep man ko kawa nyngkong hadien jan dap 4 bnai ya kiwa yalehke ka India.
Ki yalehke International ki kynthai da wan biang ko ha Shillong hadien 9 snem hadien wa pynman ya ka 2016 South Asian Games.
U Chettri da ong u wa ka Iran toh kawa khlan bha kawa em ya ka kyrdan wa 70 ha ka pyrthai iwa man 7 kyrdan ha wah ka India wei hei sien wa khaddooh wa yachem ki ha ka 2022 Asian Cup ha Mumbai da kut da 0-0 wei da jop ka India da 1-0 kam chibynta ka 2019 Gold Cup ha Bhubaneswar.
Ka Iran da psiah ko cha ka 2026 Asian Cup deiwa pynrem ya ka Jordan, Bhutan wa Singapore wei da tip ya kiwa yalehke ka Iran kam kiwa khlanbor i doh i pran.
Ka Head Coach ka Iran, ka Marziyeh Jafaribaravati da pynsñiaw ko yei kmen yei rukom pdiang ya ki deiwa bha mynsien wei da em chwa ki ha Delhi yow pynkhreh.
“Da man i kiwa da biang i pynkhreh hanla kiwa yalehke i da man ki kiwa da ngiah wei ym ye wow kheiñstiñ ya ka India wei ha waroh le tylli ki yalehke daw yaleh yow jop,” da ong ka Jafaribaravati.
Hadien wa ka India daw yachem ko wa ka Iran ha ka 21 tarik u October, ka Iran daw yachem ko wa ka Nepal ha ka 24 tarik u October wei kawa khaddooh ka yalehke toh ka India wa Nepal ha ka 27 tarik u October.
Discussion about this post