Ka seiñ HITO da phah chithi ko cha u Union Home Minister, u Amit Shah lyngba u Lat ka jylla yow tuklar u yei kajia pood hapyrdi ka Assam wa Meghalaya iwa da jia nadooh wa pynkha ya ka Meghalaya ha u snem 1971 wei ha kini ki phaw snem kiwa da lai da dooh ya boon tylli ki mynsien bru.
Da pyntip cha u Amit Shah wa i yaklam hapyrdi ki ar jylla toh i wym em poi cheiwon cheiwon yow pynlait nei eh wei chem chitom ki bru. Wei ka sorkar Assam dei langær kyntoor ko chapoh Meghalaya chei thaw ki jaitbru Ynñiawtrep khlem da burom ya kiwon kiwon ki soskular, ki kular heiwa dapoi chei yap kiwa boon ki bru ha Langpih ha u snem 2009, neitæ ha Mukroh ha u snem 2022 wei da mih leh kiwi ki kynaad neipor cheipor.
Iwa kattæ toh iwa kyntoor pood ka Assam lyngba ki Karbi kiwa da pynthut yei ah kba kiwa na Meghalaya iwa man kamwa pyndooh yei hok manbru longbru khamtam ya kini ki bru wa dooh wa duk. Wei wot hadien wa kular u Chief Minister ka Assam, u Himanta Biswa Sarma wow pyndooh pyndam yeini i thombor ym em ye u wow leh kamwa da kular, najrong ini da em leh ki seiñ kieñ suloi ka Karbi kiwa da maham wei pyndik ya kiwa chong chnong.
Kamtæ da ong wa yei thaw i bhaw ki Ynñiawtrep toh u kheiñ ki katkam ka Instrument of Accession wei kammon wa da ya mynjur hawa pynman ya ka kam chibynta ka ri India wei wow burom leh yeini.
Hajrong ini da kyntu ya u Home Minister ka ri wow tuklar smat u yow ye u wanrah yei suk i saaiñ ha khappood ka Assam-Meghalaya.
Discussion about this post