Hap thang ki pulit ya ki dieñ wa ngait ki bru wa chong ksuid hadien wa neh i kulmar da ki tayaaw       

Ha iwi i jia wa rap phylla, ki pulit da hap ki wow pynhun ya ki paidbah deiwa thang ya ar tylli ki deiñ wa ngait ki paidbah toh kiwa chong ksuid.

Ini da jia i ha Semiliguda Block wa em hapoh ka Koraput District ka Odisha wei da sdang ini waroh hadien wa yap ar ngut ha ka 9 tarik uni u bnai uwi hadien uwi ha chnong Subai wei da la kylli kiwa chong chnong na uwi u stat uwa da ong wa ini toh neidaw wa em ar tylli ki dieñ (Banyan Tree wa u Peepal Tree) wa chong ksuid ki.

Uni u stat da ong u wa em ki ksuid wa chong ha kini ki dieñ kiwa em harood ka chong, kamtæ ha ka 12 tarik da lai boon ngut ki khynroo na kani ka chnong wei da leh ki katkam wa phah uni u stat deiwa khloh ya kini ki dieñ na tre wei da kit ki ha kawi ka Tractor yow lai noh ki ha ka wah Pitaguda.

Tangwa hadien wa poor kani ka khubor, kiwa chong chnong ka Pitaguda won da khang ki wow lai noh ya kini ki dieñ deiw ngait wa kini ki ksuid wa em ha kini ki dieñ daw psiah won ki cha ka chnong ki. Kiwi ki chnong wa em cha jan kam ka Kunduli, Kolab wa Lenjiduda leh da pyrchah ki wow noh ya kini ki dieñ cha ki thaw wa haap hapoh ka chnong ki.

Related posts

Da hiar ki kaam pyrchah aiñ ya ki khynnah, ong ka DGP

October 21, 2025

Khut sñiawbha ka Holy Trinity Secondary School Moopakhar, Sutnga cha ka lehkmen Silver Jubilee

October 21, 2025

Kamtæ ini da neh i kamni hadooh chi tayaaw khlem ye u ya pynbait.

Khadooh da hap wan ki pulit kiwa da ong ya kini ki khynroo wa lai pynhaap ya kini ki dieñ wow lai booh ki cha Sunabeda Police Station yow pait ki pulit ki wei da hap leh ki pulit wow pynman yei pynsñiawthooh paidbah ha ka tayaaw wa dep deiwa kyntu ya ki paidbah wym toh u ngait biej ha ka pyrthai wa da stat da che katni neibhah ym em kam kitæ ki ksuid kiwa chong ha ki dieñ wei iwa emkaam toh yow wanrah yei suk i saaiñ.

Ka khubor kini ki dieñ wa chong ksuid da wanrah ko ya ki chnong ka Nandapur, Semiliguda, Pottangi, Koraput wa Dasmantpur Block wow khang ki ya ki surok deiwa tieñ ya em wa kit ya kini ki dieñ iwa da pynman ya ki pulit wow lai pynman ya ki pynsñiawthooh paidbah.

Hadien won wa kit ki pulit ya kini ki dieñ cha Police Station, ki paidbah won ym nood de ki wow lai cha kani ka Police Station neidaw wa joor tieñ ki ya kini ki dieñ. Neitæ won ki bru ka chnat Forest leh ym bien ki wow chimkti ya kini ki dieñ.

Kamtæ deiwa ya mynjurlang kiwa chong chnong, ki pulit da thang ki ya kini ki deiñ deiwa sakhi ki spah ngut kiwa chong chnong yow pynkut syndon yeini i kaam ha ka 18 tarik uni u bnai.