Ynne ka sngi ki paidbah ka Lapangap, West Jaiñtia Hills da sdang biang ki wow ah kba hadien wa chah pynsangeh kamwa ar tayaaw nei pyndik ki paaid Karbi khamtam na Tahpat ha ka 9 tarik uni u bnai.
Ynne ki paidbah da lang ki chi thaw hajan ka madanbol ha laad wow lai cha Pynthor Lapangap dei pisa lang’a katwa ki heh District nadooh u Deputy Commissioner, u Superintendent of Police, u waheh chnong wa kiwi lai yachem ki ya ki heh District ka West Karbi Anglong District wa ki heh Karbi ha Khanduli wow yoh ka rai wa pura chwa wow yoh u sdang u ah ya u kba.
Katwa dang joor i khuslai ki paidbah, heipor kamwa 10:15 da yoh ya ka Wyrta na u waheh chnong wa da hoi u ah ya u kba wei ymtoh u man kiwa chongchit næ wow pynawri wei wow yang chooh ki sa chibet chipor heini.
Kamtæ mar yoh ya kani ka Wyrta ki paidbah da hiar bait ki cha Pynthor khlem yang slem de neibhah wa da lai i por wei da slem ware ki wow yoh u ah ya u kba.
Mar ya hiar ki paidbah da tia chwa ki cha i bynta ka Umchyrngan (i thaw wa mih awri ini wadep) tangwa da wan hiar ki pulit ka Assam hapoh i yahkhmat u Second In-charge ka Hamren Police Station kiwa pynsangeh ya ki neibhah wym toh u ah ki ya u kba heitæ.
Da ong ki pulit wa hap ah chwa ki ya u kba wa em na liang ka chnong wei ymtoh na liang wa kam ki Karbi.
Ha ini i ah kba da em chibhah ki chynrang wa tah ya u thri, em ki chynrang wa kynthai wa ah ya u kba, em kiwa pynlang ya oo wei em won ki kynthai kiwa rah ya ka um-dih cha kiwa ah kba neidaw wa chit wei eh ka sngi hei synraan wei yada ki pulit kiwa da wan da ki spah ngut na Meghalaya.
Ynne katkam wa man hadooh chiteiñ sngi da em da ki spah ngut wa wan na ka chnong kamjooh na ki chnong wa marjan heiwa da ah chongchit ki dei mynsien wa kmen dei yooluti wow yoh u ah lut ya u kba ha kani ka Pynthor neibhah wa da dier ware i por wei boon u kba toh uwa da sih.
Discussion about this post